Shillong, Lber 01
U State President ka Trinamool Congress (TMC), Bah Charles Pyngrope, u la ong ba ka seng kam pat rai eiei halor ka ilekshon shiteng samoi sha ka Shillong Lok Sabha bad ka lah ruh ban ym ïakhun ha kane ka kynti.
“Kum ka TMC ngim pat rai namarba wat (na ka bynta) ka ilekshon MP Lok Sabha ruh ngim shym la ïaid shakhmat bad kane,” ong u Bah Pyngrope.
Haba kylli hato ka seng kan ïakhun mynta ka kynti, u la jubab ba kin sa ïakren shuwa hynrei ka lah ruh ban long ba “kan ym ïakhun naba ha uto u snem ruh ngim shym la ïakhun.”
Halor ka jingkyrshan ïa kiwei pat ka seng ne kyrtong, u Bah Pyngrope u la ong ba “ym pat shim la rai eiei haduh mynta.”
U la kdew ruh halor ka jingtlot jong ka lyer ka TMC ha ka thaiñ da kaba ong, “Kumba ka long, dei tang ma nga u MLA ba marwei na Ri-lum Khasi-Jaiñtia.”
Kumban shu kdew hangne, ka Jylla kan sa ïoh ïa ka ilekshon shiteng samoi namar ka jingkhlad noh ba kyndit jong u MP ka Shillong, u Dr. Ricky A.J. Syngkon ha ka 19 tarik u Rymphang.
