Shillong, Lber 01
Ka Voice of the People Party (VPP) ka la bthah ïa ki dkhot jong ka ba kim dei ban kyrshan ïa kano-kano ka seng saiñ pyrthei ha kane ka ilekshon ban wan sha ka Garo Hills Autonomous District Council (GHADC), ong u President ka seng, Bah Ardent Miller Basaïawmoit.
“Haba ïadei bad ka ilekshon GHADC, ngi la rai ban ym ïashim bynta, bad ngi la bthah ruh ïa ki briew jong ngi ba lada phi kwah ban kyrshan ïano-ïano, phim lah ban kyrshan kum u dkhot ka VPP – kaba mut phi lah ban kyrshan kum u ‘riew shimet,” la ong u Bah Basaïawmoit.
“Ngim kwah ba ki dkhot jong ngi ha Ri-lum Garo ba kin pyntlot ïa ki nongrim jong ka seng,” u la ong.
U Bah Basaïawmoit u ngeit ba ka NPP ka la duh bor ha Ri-lum Garo, hynrei u la bynrap ba ïa mynta ym don lad da kumwei pat na ka bynta ki paidbah katei ka thaiñ.
“Ban kren shai ha phi, ka NPP ka la duh bor ha Ri-lum Garo, kata ka dei ka jingshisha, hynrei kumba long mynta, kam don kano-kano ka lad na ka bynta ki paidbah ka Ri-lum Garo,” u la ong.
U President ka VPP u don ka jingkyrmen skhem halor ka seng jong u hapoh kane ka thaiñ, da kaba ong ba ki briew ki phai khmat sha ka VPP kum ka lad kaba kham bha.
“Ki briew ka Ri-lum Garo ki phai khmat sha ngi, kumta ngi donkam ban trei shitom shuh-shuh, ngi donkam ban ai por kham bun haba ïadei bad ka Ri-lum Garo,” u la ong.
U Bah Basaïawmoit u la maham ruh ba ka jingmih jong ka ilekshon GHADC ka lah ban ym pyni ïa ka dur kaba shisha ha Ri-lum Garo, da kaba bynrap ba ka jingtynjuh kaba shisha kan wan ha u snem 2028.
