Shillong, Lber 02
U President ka Iran’s Football Federation u Mehdi Taj u la pynpaw ïa ka jingartien ban ïashim bynta ha ka FIFA World Cup ka ban long ha United States, Mexico bad Canada hadien ba ka US bad ka Israel ki la thombor ïa ka ri jong u.
“Kaei kaba la jia ka long hadien ka jingshah thombor, ngim don shuh ka jingkhmih lynti na ka bynta ka World Cup,” la ong u Taj ha ka sports portal Varzesh3 ha ka sngi U Blei.
“Ka sorkar US ka la thombor ïa ka ri jong ngi bad kane ka dei ka jingjia kaba ngim lah ban ong da kumwei pat.”
Ha katei ka lympung ïalehkai World Cup, ka Iran kala don ha ka Group-G ha kaba la kynthup lang ïa ka Belgium, New Zealand bad ka Egypt. Kine ki kynhun kin pynkhreh ïa ki jingïalehkai ha US.
Na ka liang ki bor ba dei khmih jong ka FIFA ki la ong ba ka dang buddien ïa kane ka jinglong jingman. U Andrew Giuliani, director jong ka White House World Cup, u la ong ha ki rynsan social media ha ka sngi Saitjaiñ: “Ngin sa ïakhun ïa ki jingeh ha ka phutbol lashai ka sngi – mynta ka miet, ngi rakhe ïa ka kabu ksiar jong ka jingïoh ïa ka jinglaitluid.”
Ka jingpynkhreh jong ki kynhun na ka bynta ka World Cup kan sahkut namar ba yn nym don kano kano ka jingïalehkai ha ka por ba don ka jingsngewsih kaba 40 sngi na ka bynta u nongïalam ba hakhlieh duh jong ka Iran, u Ayatollah Ali Khamenei, uba la shah pynïap ha ka jingshah thombor ha ka sngi Saitjaiñ.
Kane kan ktah ïa ki jingïalehkai (league) bad ki jingpynbeit ryntih ïa ka World Cup ba la thmu.
Ka Iran ka don napdeng ki katto katne tylli ki ri kiba ki nongshong shnong jong ki kim lah ban rung sha US, hynrei u President jong ka US u Donald Trump u la ong ba yn ailad tang ïa ki nongïalehkai, ki bor pynïaid bad kiba ha ïing ha sem jong ki dkhot ha ka World Cup bad ka Olympic 2028 ka ban long ha Los Angeles.
