Jowai, Lber 02
Ka The Legend (Lissi Pearl) ka la jop suk da 93 run ïa ka War Jaiñtia United ha ka District Cricket League 2026 ba la pynïaid da ka West Jaiñtia Hills District Cricket Association ha ka lah sngi U Blei ha madan Khliehtyrchi.
Ha kane ka jingïakhun, ka War Jaiñtia United ka la jied ban kawang bol nyngkong watla ka la jop ïa ka kynting pisa. Te kumta ka The Legend ka la kamai 176 run bad shah pynhap baroh ki nongtied ha ki 30.4 over. U Dachange Mi Phawa u la long u nongtied uba kynsai uba la kamai 85 run na 88 bol, kynthup ïa 13 tylli ki ‘four’. U Conard Sana u la ïoh 25 run na ki 36 bol, kynthup ïa ki 4 tylli ki ‘four’. Na ki nongkawang bol jong ka War Jaiñtia United, u Wanso B bad u Phrang Khyriem ki la khur mar 3 wiket.
Haba wan beh ïa ka thong, ka War Jaiñtia United ka la kamai tang 83 run bad shah pynkhyllem baroh ki nongtied ha ki 22.2 over. U Kampher Pohlong u la tied 15 run na ki 24 bol kynthup ïa ki 3 tylli ki ‘four’. U Conard Sana na ka The Legend u la long u nongkawang bol uba kynsai bha ha kaba u la ïoh ban shim 6 wiket bad ai tang 12 run na ki 5.2 over. U Rae Sari ruh u la shim 3 wiket na ki 7 over. Ïa ka nam Man of the Match la ïoh da u Conard Sana.
Ka jingïalehkai ha ka sngi Ba-ar kan long hapdeng ka Khliehtyrchi SC pyrshah ïa ka Lion Y&SA ha ka por 9 baje mynstep.
