Imphal, Lber:
Ki bor pahara ki la kem ïa lai ngut ki dkhot kiba la shah kynnoh ba ki dei ki dkhot ba trei shitom jong ki kynhun lehnoh ba la shah ñiew beaiñ ha ki jingtreikam ba kyrpang ba la pynlong ha kylleng ka Manipur ha kine ki ar sngi ba la dep, ha kaba ki la lap ïa ka suloi, ki tiar siat bad ki tiar pyndonkam ha ka ban ïakren na kawei ka jaka sha kawei pat.
Uwei u briew uba la shah pynshisha ba u dei u dkhot jong ka People’s Revolutionary Party of Kangleipak (PREPAK) u la shah kem ha ka 1 tarik u Lber na Phaknung Awang Leikai kaba don hapoh thanad jong ki pulit ha Lamlai ha Imphal East district.
Une u briew uba la shah kynnoh ba la tip kyrteng kum u Khundrakpam Anilkumar Singh ba la tip ruh da ka kyrteng kum u Manganglakpa na Sawombung Thongkhong bad la lap ba u don ka mobile phone, ong ki heh sorkar.
Ha ka jingkhynra kaba kyrpang kaba la pynlong ha ka 28 tarik u Rymphang, ki bor pahara ki la ïoh ban kem ïa uwei uba la kynnoh ba u dei u dkhot ba trei shitom jong ka Kanglei Yawol Kanna Lup (KYKL) na ka thaiñ Yairipok Lamkhai kaba hap hapoh jong ka Thoubal police station. Une u briew u dei uba la tip kyrteng kum u Ibungomacha Laishram bad la tip ruh da ka kyrteng kum u Rocky bad kum u Ibomcha (43), u dei u nongshong shnong jong ka shnong Gaili kaba don ha Peren district, Nagaland bad u sah mynta ha Singjamei Yumnam Leikai ha Imphal West district.
La ïoh ban kurup ïa kawei ka mobile phone ryngkat bad ka sim card na u.
Kawei pat ka jingkhynra kaba la long ha ka 28 tarik u Rymphang, ka la pynlong ban kem ïa uwei u briew uba la 29 snem ka rta uba la shah kynnoh ba u dei u dkhot jong ka People’s Revolutionary Party of Kangleipak (Progressive) kaba la tip ruh kum ka PREPAK (Pro) na ka jaka sah jong u kaba don ha Wangoi Khaidem Leikai kaba hap hapoh ka thanat pulit jong ka Wangoi ha Imphal West district.
Une uba shah kynnoh u Khaidem Narendra Singh bad ba la tip ruh da ka kyrteng kum u Angou bad kum u Maikeingakpa bad la kurup na u ïa kawei ka suloi 9 mm ryngkat bad ki kuli, saw song ki kuli 9 mm, bad kawei ka mobile kaba don ka sim card.
Ki tyllong khubor na ki pulit ki la ong ba kine ki jingkem ki dei shi bynta jong ki lad jingïakhun pyrshah ïa ki lehnoh kiba dang ïaid shakhmat kiba thmu ban tehlakam ïa ki kam be-aiñ bad ban pynthut ïa ki lad jingïadei jong ki seng ba la khang pyrshah.
Ka jingtohkit kaba kham bniah ka dang ïaid shakhmat ban lap dien shuh shuh halor ka jingdonkti jong ki dkhot ki kynhun kieng atiar ha ka jylla.
Ki shipai ki la ïai bteng ban pynlong ïa kum kine ki jingkhynra ba kyrpang khnang ban lah ban khanglad ïa kino kino ki kam pyntriem kiba lah ban wanjia ha ka jylla ha kano kano ka por.
Kumba la buhthong, ki pulit ha ryngkat ka jingïatreilang bad ki shipai ki la thmu ban pynduh pyndam ïa ki kam pyntriem kham kloi katba lah.
