Shillong, Lber 02
Ka Meghalaya Professional Boxing Council (MPBC) ka la lah ban pynlong ïa ka ‘Fit India Campaign’ kat kum ka jingbthah da ka Sports Authority of India bad ïa kane la kyrshan da ka Sorkar Jylla hapoh ka skhim CMYDS 2024-2025.
Ïa kane la pynlong lyngba ka ophis jong ka Deputy Commissioner, East Khasi Hills District ha ka 6 bad 7 tarik u Rymphang 2026 ha kaba la sdang naduh 7 baje mynstep.
Kane ka jingthmu jong kane ka long ban pynïoh ïa ka jingkoit jingkhiah ha ka met ka phad, ka jinglong ryntih, bad ka jingpynsngewthuh shaphang ka jingdonkam jong ka jingïalehkai bad ka jingim kaba koit ba khiah hapdeng ki samla. Ki nongïashim bynta ki la ïashim bynta shitrhem ha ki jinghikai ïakura, ban ïoh ïa ka met ka phad kaba shait ba khlaiñ, bad ki jingpynsngewthuh paidbah jong ka Fit India Movement.
Ki bor ba dei khmih ki la ïaroh ïa ka jingai jingkyrshan na ka Sorkar Jylla bad na ka ophis jong ka Deputy Commissioner, East Khasi Hills District, na ka bynta ban pynshlur ban kyntiew ïa ki kam ïalehkai bad ka jingïashim bynta jong ki samla ha ka Jylla.
Ki bor pynïaid ki la pynpaw ba kin dangïai bteng ban pynlong ïa kum kine ki prokram ban kyntiew ïa ki khynnah naduh ba ki dangrit.
