Shillong, Lber 02
Ka Kur Syiemlieh FC ka la rah ïa ka nam lahduh ha ka lympung ïalehkai 1st Invitation Knockout Football Tournament 2025-26 ba la pynlong da ka Umsawrang Sports Club & Youth Welfare Organization, hadien ba ka la lah ban pynliem noh ïa ka Meghalaya Police FT lyngba ka tie-breaker da 6-5 kol ha ka jingïakhun final kaba la long ha ka lah sngi U Blei ha Umsawrang.
Ïa kane ka lympung la sdang naduh u Nohprah jong u snem ba la lah, ha kaba la wan shim bynta da ki kynhun ïalehkai bapher bapher katei ka thaiñ lem bad katto katne ki klob jong ka nongbah kiba shim bynta ha ka Shillong Premier League jong ka Shillong Sports Association.
Te kumta lyngba katei ka nam jop, ka Kur Syiemlieh FC ka la khur ïa ka khusnam pisa kaba T.2 lak tyngka, katba ka MLP ka ïoh T.1 lak. Kat kum ka kyrwoh la ong ba ki paidbah nongpeitkai ha kane ka jingïakhun final ki long palat 8 hajar ngut ha kaba la wan sakhi lang ruh da u Myntri ka tnat ïalehkai ka Sorkar Jylla u Bah Wailadmiki Shylla kum u kongsan, kumjuh u Bah Olan Sing Suiñ, MLA ka Mawsynram kum u Symbud Kongsan bad kiwei kiwei de ki riewpaw khmat.
