Shillong, Lber 02
Ka Tyrsad Area Sports Association (TASA) ka la sdang ïa ka lympung ïalehkai phutbol ki kynthei ïa kaba la tip kum ka TASA Women Foot-ball League 2026 ha ka sngi Saitjaiñ ha madan Mawlum kaba ha Tyrsad.
Ïa kane ka lympung la wan ban plie da u Bah Auspicious Lyngdoh ha ryngkat ka jingïadon lang ki dkhot nongkitkam ka TASA. Ha kane ka lympung la wan shim bynta da shiphew tylli ki kynhun ha kaba la phiah ha ki ar tylli ki group. Ha ka Group-A ki long ka Nongdawah, Mawsawrit, Mawliehpoh, Mawlum Tyrsad bad ka Nongthymmai Neng SC. Katba ha ka Group-B ki long ka Wahmawpat, Pomsanngut, Lawkhla Mawlong, Nongmadan bad ka Mawsadang SC. Ki ar tylli ki kynhun ki ban wan ha ki kyrdan ba hakhlieh ki ïoh rung sha ka semi final.
Haba phai sha ka jing -ïalehkai jong kane ka sngi sdang, ka Lawkhla Mawlong ka la pynliem noh ïa ka Nongmadan da 1-0 kol bad ïa kane ka la thep da ka Bakhamkor Mawlong ha ka minit kaba 21.
Ha kawei pat ka jingïakhun kaba ar, ka Mawliehpoh ka la jop da 3-0 kol ïa ka Mawsawrit. Tang mar ïasdang ka jingïalehkai ka Mawlieh-poh ka la ïoh ban pynkhih jar nyngkong eh lyngba ka Nishalin Nongrum ha ka minit kaba 4, kumjuh ïa ka kol kaba ar la thep da ka Ribanta Nongbri ha ka min ba 10 bad ïa ka kol kaba khatduh la thep da ka Naisha Nongrum ha ka 35 na ka bynta ban khur syndon ïa ka jingjop.
Kane ka lympung kan bteng biang ha ka 7 tarik ha kaba ka Nongthymmai Neng kan ïakhun pyrshah ïa ka Nongwah ha ka por 10:30 mynstep, katba ka Mawsadang pyrshah ïa ka Pomsanngut ha ka por 12 baje mynsngi.
