Shillong, Lber 02
Ka Sputnik CC ka la pynliem noh ïa ka Nongmyn-song CC da 44 run na ka bynta ban khur jingjop ha ka ka Super Division Cricket League 2026 ba la pynlong da ka Shillong Cricket Association (SCA) ha ka lah sngi U Blei.
Watla ka la khur ïa ka jingjop, hynrei ka Sputnik ka la duh rung sha ka semi final na ka Group-A namar ka la shah tam ha ka Nongmynsong bad ka Royal CC, kiba la don ha ka kyrdan ba nyngkong bad ba-ar. Katba na ka Group-B ki kynhun kiba la rung sha ka semi final ki long ka Rangkynsai bad ka Sporting.
Te kumta ka jingïa-khun semi final kaba nyngkong kan long ha ka 4 tarik hapdeng ka Royal pyrshah ïa ka Sporting, katba ha ka 5 tarik ka Rangkynsai ïa ka Nongmynsong.
Haba phai sha kane ka jingïakhun kaba la long ha madan ïalehkai jong ka MCA kaba ha Polo, ka Nongmynsong kaba la jop ïa ka kynting pisa, ka la ailad shwa ïa ka Sputnik ban tied nyngkong ha kaba ka la kamai 298 run bad shah pynhap 7 wiket ha ki 45 over. U Swarajeet Das u la lah ban pynpaw ha kaba u la ïoh ban khyrwit ïa ka spah run kaba 142 na ki 129 bol bad u Amiangshu u la ïoh 80 run na ki 82 bol. Katba u Santhosh PM bad u Anish Charak ki la khur mar 2 wiket na ka bynta ka Nongmynsong.
Haba wan beh ïa ka thong, ka Nongmynsong ka la kamai tang 254 run bad shah pynhap 7 wiket ha ki 45 over. U Abhisek Gupta u la khyrwit ïa ka shiteng spah kaba 55 run na ki 73 bol bad u Pushkar Raj u la ïoh 38 run na ki 26 bol. Katba u Arbin Singh u la khur 3 wiket bad ïa ki 2 wiket la ïoh da u Avinav Choudhury. Ïa ka nam Player of the Match la khur da u Swarajeet Das.
