Shillong, Lber 03
Ka 35th JK Architect of the Year Awards, ka ban sdang da ka Jury Meeting bad Entries Exhibition kan long ha ka 13 bad 14 tarik u Lber 2026, ban pynlong da ka JK Cement Ltd. Kumta kino kino kiba sngewtynnad ïa ka architecture bad kiba trei ha kane ka kam kin ïawanlang ha Shillong ban ïashim bynta.
Mynta ka kynti, ka jingïalang kan long ha ka nongbah Shillong, kaba la tip kum ka “Scotland of the East,” ha kaba la kular ban pyninam ïa ka sap ka phong, ka jingnang jingtip bad ka jingshemphang ha ka lain architecture.
Kane ka prokram kan khring ruh ïa ki samla pule na ki architecture college kiba don ha ki thaiñ marjan, kiba yn ai lad kyrpang ban sakhi ïa ki design kiba thymmai bad kiba kyrpang kiba yn pyni ha ka Entries Exhibition. Ha kane ka exhibition yn pyni ïa shibun ki architectural designs kiba phylla, kiban ïakhun na ka bynta ki 13 tylli ki khusnam ba kyrpang.
Ki architect kiba pawnam na kylleng ka ri India bad na kiwei pat ki ri kin wan lang ban bishar bniah ïa ki entry bad ban jied ïa kiba dei hok ban long ki nongjop. La khmih lynti ba ka jury meeting kan long ka jingïakren kaba shongkhia, kaba ïasam jingmut, jingstad bad jingïohi jngai, kaba pyni ïa ka sap bad ka jingnang jingstad bapher bapher jong ka kynhun ki architect.
Ha kane ka jingïalang yn wan shim bynta ki heh Sorkar, ki architect na ka Jylla bad kiwei ki Jylla bad ki riew pawkhmat na ka construction industry.
“Ngi sngewkmen shibun ban pynlong ïa ka 35th JK Architect of the Year Awards ha Shillong,” ong u Rana Pratap Singh, Administrator ka JK AYA.
“Kane ka rynsan kam dei tang ban rakhe ïa ki jingjop ha ka architecture hynrei ka pynshlur ruh ïa ka jingïatreilang bad jingïoh mynsiem hapoh ka industry. Ngi khmih lynti ban pdiang sngewbha ïa ki nongwan shim bynta bad ki nongwan peitkai na jan bad na jngai ha kane ka prokram.”
