Shillong, Lber 03
14 ngut ki ‘thei ïalehkai Kickboxing ka Jylla hapoh ka lama jong ka Meghalaya State Kickboxing Association (MSKA) ki la wanrah burom ïa ka Jylla da kaba khur takma ha ka Khelo India Asmita Kickboxing Women’s Zonal League kaba la long ha Siliguri.
Kane ka lympung ka la sdang naduh 26 tarik u Rymphang haduh 1 tarik mynta u Lber ha kaba la wan shim bynta da ki ‘thei ïalehkai na ki 11 tylli ki Jylla kiba hap hapoh ka North Zone.
Kane ka lympung ka long shi bynta ban jied ïa ki nongïalehkai kiba kynsai ki ban ïoh rung sha ka Khelo India Asmita Kickboxing Women’s National League 2025-26 ka ban long ha Chennai, Tamil Nadu naduh 26 haduh 29 tarik mynta u bnai.
Ïa ka takma ksiar la khur da ka Daniella I. Wanda Mylliemngap bad ka Medariphylla L. Nongbri, katba ïa ki takma rupa la khur da ka Isapynbiang Lyngdoh bad ka Baïahunlang Mylliem-ngap. Ïa ki takma rnong la khur da ka Damansani Kharsahnoh, Ineshabahun Dkhar, Rikyntiew Nongrum, Iaribynta Kharsahnoh, Ariana N. Marweiñ, Man -dasumar Nongphud, Emiliana Papang, Lidia Wahlang, Phidari Rani bad ka Emiliana Susngi.
Na ka liang ka Meghalaya State Kickboxing Association ka la ai khublei ïa kine ki ‘thei ïalehkai kiba la lah ban pynpaw ïa ka jingtbit ha katei ka lympung bad ruh ban wanrah burom ïa ka Jylla hi baroh kawei.
