Shillong, Lber 03
Ka Rangkynsai ka la pynliem noh ïa ka Lok Bhawan da 120 run na ka bynta ban khur ïa ka jingjop kaba khatduh haka Super Division Cricket League 2026 ba la pynïaid da ka Shillong Cricket Association (SCA) ha ka sngi Ba-ar.
Ha kane ka jingïalehkai kaba khatduh jong ka Group-B kaba la long ha madan jong ka MCA ha Polo, ka Rangkynsai ka la kam trai ban tied nyngkong ha kaba ka la kamai 253 run bad shah pynhap 10 wiket ha ki 42.1 over. Kane ka la wan lyngba ka jingïakhun tyngeh u Ajay Duhan uba la kamai 60 run na ki 93 bol bad u Kishan Lyngdoh u la ïoh 59 run na ki 39 bol. Katba u Ayushman Das u la khur 5 wiket bad ïa ka shi wiket la ïoh da u Pankaj Mandal na ka bynta ka Lok Bhawan.
Haba wan beh ïa ka thong, ka Lok Bhawan ka la kamai tang 133 run bad shah pynkhyllem baroh ki nongtied ha ki 28 over. U Ayushman Das u la tied 52 run na ki 54 bol bad u Asif Khan u la ïoh 26 run na ki 36 bol. Katba u Aryan Borah bad u Sudhir Sahani ki la khur mar 4 wiket na ka bynta ka Rangkynsai. Ïa ka nam Player of the Match la khur da u Sudhir Sahani, uba la khur 4 wiket bad tied 8 run.
Te kumta ka Rangkynsai ka la long ka kynhun kaba khlem shah rem naduh kaba sdang kane ka lympung ha kaba ka la kamai 10 point ïa ki san sien ïakhun jong ka Group-B bad ka la rung lypa sha ka semi final bad kan pynkhreh ban ïakhun pyrshah ïa ka Nongmynsong ha ka 5 tarik bad ka Royal ïa ka Sporting ka ban long ha ka 4 tarik.
