Shillong, Lber 03
Ka National Peoples’ Party (NPP) kaba lamkhmat ïa ka Sorkar Meghalaya Democratic Alliance (MDA) ka la pynpaw ba kan sei beit ïa u ne ka kyrtong ban ïakhun ha ka ilekshon shiteng samoi sha ïingdorbar Parliament.
“Ka NPP kan sa pynïeng kyrtong ban ïakhun ïa ka ilekshon shiteng samoi sha ïingdorbar thawaiñ jong ka Lok Sabha,” la ong u President ka NPP Meghalaya u Bah Prestone Tynsong uba dei ruh u Symbud Myntri Rangbah ka Jylla.
Lah ban kdew ba ka jingdon biang jong ka ilekshon shiteng samoi sha ïingdorbar jong ka Lok Sabha, ka dei hadien ka jingkhlad kyndit noh jong u MP ba mynta u Dr Ricky AJ Syngkon jong ka VPP.
Ha kawei pat ka liang, u Bah Prestone u la ong ba ïa mynta na ka liang ka NPP ka dang phai khmat shwa ïa ka ilekshon MDC sha Garo Hills Autonomous District Council (GHADC) ka ban long ha ka 10 tarik Ïaïong, 2026.
“Ïa mynta ngi dang phai khmat ïa ka ilekshon MDC sha GHADC bad hadien kata ngin sa shong pyrkhat ïa ka kyrteng kaba kham biang ban phah ïakhun ha ka ilekshon MP shiteng samoi,” la ong u Bah Prestone bad bynrap ba ki don bun kiba kwah ban ïakhun ïa kane ka ilekshon hynrei kum ka seng kan sa shong bad eksamin bha ïano ba kan phah.
Haba kylli, u Bah Prestone u la ong kano kano ka ilekshon ka long kaba eh suda bad ka seng ka hap ban trei shitom ban poi sha ka thong jong ka jingjop namar ka ilekshon la ka dei kano kano ka ilekshon, la ka dei ka MP, MLA ne MDC hap ban trei shitom namar kim dei kiba suk.
Shuh shuh u la ong, ba lada ïoh da u MP na ka NPP kan ïarap shibun ha ka ban buddien ïa ki mat ba sahteng ha Delhi, kum ka ILP, ka ktien Khasi bad lada don ïa u MP lajong, un lah ban tynruh bad ka lah ban urlong kloi ki mat ba sahteng.
