Ha kane ka juk kaba mynta la sakhi ba ka jingdon jong ki briew kiba la nang la stad ka la nangkiew hynrei haba phai pat sha ka burom ka akor, ngi ïohi ba ka la nanghiar katba nangmih ki sngi. Kata ka jingïaburom para briew imat kam don shuh. Haba ngi phai sha ki juk bad ki phew snem kiba la leit noh, haba ki briew ba nang ba stad ki dang duna katba ka nang pat ban don ka akor bad burom para briew. Balei haduh katne. Ha ka jaka ba ngin ïaid lang ryngkat ka jingnang jingstad bad ban ïa burom mar kylliang, ngi sakhi ba ka la long pynban da pyrdet. Kam don shuh ka jingpyrkhat para briew namar katkum ba ka paw imat ka la synshar ka jingsngew sarong, kaba pynlong ban eh pat ka ban pyndem hakhmat kiwei.
Haba ngi phai bad kren halor ka jingdheng kali, la ka dei ha nongbah Shillong ne ha kiwei pat ki bynta, ngi ju sakhi ba barabor ka dei beit na ka jingleh hi jong u khun bynriew. Hooid kat nang ïaid ki por, ka jingbun ki kali ruh ka la jur bha khamtam lei hadien ba ha kum kane ka por, ka jingthied ïa ki kali ki motor kam dei shuh ka kam kaba eh bad kaba la pynsuk bha da ki bank bad ki kompeni. Wat hapdeng ka jingbun jong ki kali, hooid ki don ki surok kiba neh kumjuh bad ki don pat kiba la pynheh bad ngi la sakhi ruh ïa ka jingmih jong ki surok ba thymmai ha kylleng ki bynta na ka bynta ban pynsuk ïa ka leit ka wan. Lada kum ki nongñiah kali ne kiba ïaid ha lynti ki ïa burom lem mar kylliang, kan long kawei na ki bynta ka ban kham pyllait ïa ka dheng kali.
Kum ki nongshong shnong, ngi ju ïa ud bad kren sharum shaneng halor ka dheng kali. Hynrei lada ngim sdang na lade, kumno ngin khmih lynti na kiwei. Ka rukom pynïeng kali ka dei kawei na ki daw kaba wanrah bha ïa ka dheng kali, namar haba pynïeng ngi sngew ba haba la biang ïalade kam pher lada ka pynwit ne khanglad ïa kiwei. Ha kum kane ka juk jong ka jingkiew ka kor social media, ngi la ïoh ruh ban sakhi ïa ki briew kiba pynïeng kali katba mon khlem pyrkhat shuh ïa kiwei bad sngew ba ka surok ka dei ka jong ki. Ka jingpynheh ïa ki surok ne ka jingshna da ki jingkieng ba thymmai kiba kham heh ban pynsuk ïa ka leit ka wan ruh, la ïohi ba kim shym la ai jingmyntoi satia namar ki la kylla long pynban kum ki jaka pynïeng kali, kaba la nangwanrah pynban ïa ka dheng kali kaba kham jur. Haba phai lei sha ki nongñiah arshaka, la i kumba ka surok ka la dei beit ka jong ki, kiba la shu ïaid bad tur beit kat naba ki mon khlem da pyrkhat shuh ïa kiwei khamtam kiba wan na ka liang pyrshah la kin lait ne em.
Kumta ka long kaba donkam ïa ka tnad pulit kaba peit ïa ka kam pynïaid kali ba dei ban leh beit da kaba tyngeh ïa kiba pynkheiñ ïa ki kyndon kiba la buh. Ym dei shuh ban shah ba kin pynïeng kali pathar hynrei ba kin pynïeng ha ki jaka kiba la mang kyrpang. Ngi lah ban sakhi ruh ba ki kali kamai naduh ki taksi kamai, ki kali saw, bos saw bad kumjuh ruh ki arshaka kiba kamai, ki ïeng kat haba shem khlem pyrkhat shuh ïa kiwei. Kumta donkam ban pynbeit bad bthah da kaba tyngeh ba ka rukom ïeng kali ka dei ban long ha ka rukom kaba biang bad lada ym don ka jingkohnguh ne burom ïa ka jingbthah dei ban leh tyngeh beit katkum ki kyndon aiñ. Lada mon hi ka Sorkar, kano kano ka kam ruh kan long beit.
