Shillong, Lber 03
Ka Khasi Students’ Union (KSU) ka la pynpaw ka jingsngewkhia kaba jur halor ka jingbym kheiñ snep jong ka Sorkar ïa ki samla pule kiba hap ban leit thoh ïa ka eksamin Common University Entrance Test (CUET) shabar ka Jylla.
“Ka seng lyngba ka ‘Education Cell’ sa shisien ha kane ka kynti ka pynpaw ïa ka jingsngewkhia kaba jur ïa ka jingbym kheiñ snep jong ka Sorkar ïa ki samla pule jong ngi, kiba dei ban ïaleh ïa ka eksamin CUET man la u snem.,” ong u Education Secretary ka KSU, samla Pynkmenlang Sanmiet ha ka kyrwoh khubor.
U la ong ruh ba ka jingpynngat ‘Centre’ thoh eksam ïa ki samla pule shabar ka Jylla man la u snem kam dei shuh ka jingbakla hynrei ka la dei ka jingleh khnang da ka jingbym kheiñ snep, jingkheiñ poh dor, ka jingleh matlah bad ka jingbuh shadien ïa ka jingkordor jong ka pule-puthi.
“Man la u snem, ka seng ka ju ïai kren, ka ju ïai phah da ki shithi sha ka Sorkar ban pyntip ïa kane ka kam ba da ki hajar ngut ki samla pule ka Jylla ki hap ban leit shabar na la ka jong ka Jylla tang na ka daw ka jingbym kheiñ snep jong kane ka Sorkar ïa la ki khun samla,” u la ong.
Une u nongïalam u la ong ruh ba ka seng bad ka Jylla baroh kawei ka la ïohi shai na ka snem sha ka snem ba kane Sorkar ka long kaba mutlop da kaba leh kyllut bad matlah ha kaba ïadei bad ka pule-puthi, pynban kaba ju pynlut por ban pynleit jingmut tang ïa ki kam tamasa ki bym wanrah jingmyntoi eiei ïa ka lawei jong ki samla ka Jylla.
Shuh shuh u la ong ba lada dei shisha ka sien banyngkong, lehse lah ban ong ba ka don ka jingduna hangne-hangtai, hynrei naduh ba mih ka CUET haduh mynta, “ban shu matlah sah te kam lah ban long”.
“Hato matlah u ‘Education Minister’ ne matlah ki ‘Officer’? Lyngba kane ka kyrwoh, ka seng ka kyntu bad dawa mardor ïa ka Sorkar ban pynbeit bad pynbiang shisyndon ïa ki jaka thoh eksamin CUET hapoh ka Jylla kumba kiwei ki Jylla ki pynbiang ïa la ki samla pule,” u la ong.
