Shillong, Lber 03
U Lamphang ka Ïingdorbar Thawaiñ ka Jylla, u Thomas A. Sangma ha ka Lah Sngi U Blei u la plie ïa ka ‘Youth Parliament’ 2026 kaba ar sngi kaba la pynlong da ka shnat pule Political Science jong ka Tura Christian College ha Tura District Auditorium, West Garo Hills.
Haba kren sha ki samla, u Thomas u la ong ba u “sngewhun haduh katta-katta” ban ïohi ïa ka ‘Youth Parliament’ banyngkong eh jong ka Tura bad u la ïaroh ïa ki nonghikai jong ka kolej, ki samla pule barim bad ki nongpynïaid na ka bynta ban pynroi ïa ki nongrim jong ka synshar paidbah.
“Ka Ïingdorbar ka dei ka jaka kaba ïakren shaphang ki jingai jingmut, ka jingbuh ïa ki jingkylli, bad ban ïatai halor ki lad ki lynti na ka bynta ka bha ka miat jong ki paidbah jong ngi. Ka ‘Youth Parliament’ ka ai ha ki samla pule ïa ka lad ban mad hi dalade ïa kane ka rukom synshar paidbah,” u la ong.
Haba phai sha ka phang – “The Voice of Youth: Shaping the Future of Governance”, u Thomas u la ong ba ka lawei jong ka synshar paidbah ka shong ha ki nongshong shnong kiba don ïa ka jingtip, kiba don ka jingkitkhlieh bad kiba don ïa ka nongrim.
Shuh shuh u la kyntu ïa ki nongïashim bynta ban pynkylla ïa ka bor sha ka jinglong nongïalam kaba don ka jingkitkhlieh, da kaba pynkynmaw ïa ki ba ka jinglong nongïalam “kam dei ban kren jam hynrei ban pyrkhat jylliew bad ban shakri khlem da pyrkhat ïalade.”
Da kaba sot na – 1 Timothy 4:12, u la kyntu ïa ki samla pule ban ïalam da ka nuksa “ha ka ktien, jinglong, jingieid, jingngeit, bad ka jinglong khuid.”
Na ka liang u Commissioner & Secretary barim bad Adviser (Legislation), ka Ïingdorbar Thawaiñ ka Jylla, u Dr. Andrew Simons, u la ïaroh ïa ka jinglong ryntih jong ki samla pule, ka jingwad bniah bad ka jinglong rangbah ha ka jingïatai, da kaba khot ïa kane ka jingïalang kum ka jaka ai jinghikai na ka bynta ka jinglong nongshong shnong bad ha ka liang ka ‘Parliamentary Decorum’.
