Jowai, Lber 03
Ka Khasi Students’ Union (KSU) Jowai Circle ha ka 3 tarik Lber ka la phah ïa ka National Highways Authority of India (NHAI) ba kan pyndam bad pynbeit ïa ka jingspel dak bakla ïa ka shnong Khliehriat na ka signboard ha Soomer, Lad Bypass ha West Jaiñtia Hills da kaba thoh ‘Khaleriat,’ bad ai por hapoh shibnai ban leh ïa kane.
Ka Seng hadien ka jingïoh pdiang ïa ka jingujor na ki nongshong shnong, kumta mar mar hapoh ka jingïalam u President Ewanmi Phawa ha ryngkat ki dkhot ka Circle ki la leit sha katei ka jaka bad phah pyndam noh ïa katei ka jingthoh kaba bakla.
Ka Seng lyngba u kyrwoh ka la ong ba kane ka jingbakla spel dak ïa ka shnong Khliehriat kam dei satia ka sien kaba nyngkong hynrei ka dei kaba la jia teng ha ki por kiba la dep, bad wat ha kawei ka bank ruh.
Kumta ka Seng ka la maham ba kiba kum kine ki jingpyrshang ban pynkylla kyrteng ïa ki shnong ha Khasi bad Jaiñtia Hills kan ktah jur ïa ka jingsngew sarong jong ki nongshong shnong khamtam kiba dei ki trai shnong.
“Kane ka jingbakla kan wanrah ka jingduh ïa ka burom kaba khraw jong ka shnong Khliehriat,” ka la ong.
Halor kane, ka seng ka la aiti ruh da ka shithi sha ka NHAI ba kan buh noh da kawei pat ka signboard ha ryngkat ka jingspel dak kaba dei, bad ban pynbeit ruh ïa kiwei pat ki signboard, ki kot ki sla bad ki rynsan digital kiba don ïa kane ka jingbakla.
Ka KSU ka la maham ruh ïa ki ophis, ki dukan bad kiwei pat ba kim dei ban thoh bakla ïa ka kyrteng shnong, bad maham ruh ba lada ka lap nangne shakhmat kan leh da kaba tyngeh katkum ka aiñ.
