Khliehriat, Lber 03
U District Magistrate (DM) jong ka East Jaiñtia Hills District u Manish Kumar, IAS, u la pyntip ba kala don ka jingïakynad bad ka jingïashoh ïadat hapdeng ka shnong Lama bad Lakadong Ummat, East Jaiñtia Hills District.
U la pyntip ba kane, kala mih na ka jingïakajia jaka na ka bynta ka jingtyrwa ïa ka surok High Speed Corridor, ha ka por ka jingpynlong ïa ka sorjamin ne Joint Measurement Survey ha ka 3 tarik Lber kaba la wanrah ka jingmynsaw jong ki nongshong shnong ka Lama.
U la ïathuh ba la ïoh jingtip ba ka la don ka jingpyndonkam da ki tiar pynmynsaw kum ki suloi, ki lathi, ki wait, ki tiar pynbthei bad kiwei de ki tiar pynmynsaw, kaba la wanrah ïa ka jingma bad jingmynsaw jong ki ar shnong.
Haba pyndonkam ïa ki bor, u District Magistrate, East Jaiñtia Hills District, Khliehriat u Manish Kumar, IAS u la pynjari da ka Section 163 jong ka Bharatiya Nagarik Suraksha San-hita (BNSS), 2023 hapoh ki jaka ba don jingïakajia hapdeng ka shnong Lama bad Ummat, East Jaiñtia Hills District.
La khang pyrshah ban ïalum lang palat ïa ka 5 (san) ngut ha ki jaka ba don ka jingïakynad. La khang pyrshah ban rah ïa ki dieng, ki lathi, wait, tiar siat, ki tiar pynbthei, lane kino kino ki tiar pynmynsaw briew ne ki tiar kiba lah ban pyndonkam kum ki tiar siat.
La khang pyrshah ïa kano kano ka jingleh jong ki briew ne ki kynhun kiba khanglad ne pynthut ïa ka jingleit jingwan laitluid jong ki briew, ki kali, ne kiba pynpoi ïa ki mar ba donkam.
La khang pyrshah ïa uno uno ne kino kino ki kynhun ban thaw ïa kino kino ki jait jingpynkulmar kaba ktah ïa ka shongsuk shong shngaiñ jong ki riew paidbah.
Ka jingpynkheiñ ïa kane ka hukum kin shah pynshitom hapoh ka aiñ katkum ki kyndon ba ïadei bad ka Bharatiya Nagarik Suraksha (BNS) 2023 bad kiwei kiwei ki pat ki kyndon katkum ba shong ka aiñ.
Namar ka jinglong kyrkieh jong ka jinglong jingman, kane ka hukum kan treikam mardor naduh ka por ba pynbna tad haduh ban da pynmih da kiwei pat ki hukum.
