Shillong, Lber 03
U Dr. Batskhem Myrboh uba dei u nongaiktien jong ka Voice of the People Party (VPP) u la kular ban buddien ïa ki jingangnud jong u Dr. Ricky AJ Syngkon u MP Lok Sabha uba la khlad noh.
Haba ïakren bad u Dr. Batskhem u la pynpaw ba u sngewbynnud ïa ka jingkhlad noh u Dr. Ricky AJ Syngkon hynrei kum u nongtrei jong ka VPP u hap ban kohnguh haba ka Election Committee ka la tyrwa ïa ka kyrteng jong u ban phah sha ka State Executive Committee ba kan shim ïa ka jingmynjur na bynta ban ïakhun ïa kane ka ilekshon shiteng samoi.
“Lada dei ma nga ne dei mano mano ruh haba ka seng ka la ibit ban mih bujli ha jaka u Dr. Ricky Syngkon, ngi hap ban kohnguh ban pyndep ïa ki jingkular ha ka ilekshon MP ha u snem 2024,” u la ong.
U la pynpaw ba ha ka kam ilekshon ym dei ban kheiñ sting namar ka jingjop ka dei beit ka jingkyrshan jong ki paidbah.
Shuh shuh u la ong ha ka kam shakri paidbah ka long kaba donkam hynrei ha ka kam hikai ruh ka long kaba sngewtynnad hynrei ka kam kan sa batai nangne shakhmat.
U la pynkynmaw ba u hap ban buddien ïa ki mat kiba ka seng ka buh ïa ka jingkular hakhmat ki paidbah ha ka ilekshon MP ha u 2024 kaba dei halor ka jingithuh ïa ka ktien Khasi ha ka khyrnit kaba phra bad ka Inner Line Permit
U la ban biang ba ki kam kiba u Dr. Ricky Syngkon uba la prat lynti ha ka por ba u dang long MP un hap ban buddien.
Kum ban shu pynkynmaw, u Dr. Batskhem Myrboh u dei u nongaiktien ka VPP naduh ka ilekshon MLA, MP bad MDC hynrei naduh ba la khlad noh u Dr. Ricky Syngkon kiba bun ki paidbah ki pynpaw ïa ka kyrteng jong u ban mih bujli bad ka State Election Committee ruh kaba la shong pyrkhat ka la shim ïa ka rai ban phah ïa ka kyrteng u Dr. Batskhem sha ka State Executive Committee.
Kaba sah mynta ka long ba ka State Election Committee kan sa shong jingïalang ha kine ki sngi ban mynjur ïa ka kyrteng jong u Dr. Batskhem Myrboh khnang ban pynithuh ïa ki paidbah namar ka Election Commission jong ka ri India kan sa pynbna ïa ka tarik thep vote ha kano kano ka por khnang ban pyndap noh ïa ka shuki kaba la thylli.
