Jowai, Lber 03
Ka Joint Coordination Committee on Reservation Policy (JCCRP) kala kyntait ïa ka kaiphod jong ka Expert Committee halor ka State Reservation Policy bad pynbor ban phiah sha ka lai bynta ïa ka bhah thungkam ba 80% jong ka jylla Meghalaya hapdeng ki jaidbynriew Khasi, Jaiñtia bad Garo.
Ha u kyrwoh ba la pyllait ha ka 3 tarik Lber, ka JCCRP ka la ong ba ka jingïalang kaba la long ha ka 2 tarik Lber kaba la pynïasoh lang da baroh ki kynhun seng ha ryngkat ki riew shemphang bad ki nongmihkhmat napoh Rilum Jaiñtia ki la rai ban dawa ïa ka hok bad ka bhah ba dei hok na ka bynta ki paid ka Rilum Jaiñtia, da kaba pynshong nongrim skhem ha ki kyndon jong ka Riti Synshar jong ka ri India.
Kane ka kynhun ka la kynthoh ba ka jingpynwandur ïa ka bhah ka dei ban kdew halor ki lai tylli ki Autonomous District Council, ka JHADC, KHADC bad GHADC.
“Kano kano ka policy kaba ïadei bad ka bhah kyrpang ka dei ban long kaba la shna pynwandur katkum ka jingithuh da ka Riti Synshar jong kine ki Council,” ka la ong.
Ka JCCRP ka la kyntu ruh ïa ka Sorkar MDA ba kan pynlong ïa ka Socio-Economic Survey ha baroh ki lai tylli ki ADC da kaba ong ba ki rai kiba hadien ki dei ban long kiba pynshong nongrim ha ki jingtip, ka jingshong hok bad kiba pynpaw ïa ki jingshisha katkum ka jinglong jingman.
