Shillong, Lber 03
U MLA ka BJP u Bah A.L. Hek u la ong ba ka party ka dang pynkhreh ban ïoh kyrtong na baroh 29 tylli ki Konstitwensi ha ka ilekshon sha Garo Hills Autonomuos District Council (GHADC), ka ban sa long ha ka 10 tarik u Ïaïong, 2026.
“Haduh mynta ka seng ka la pynbna ïa ki kyrtong na ka bynta 19 tylli ki Konstitwensi, katba ïa ki kyrteng kiba dang sah yn sa pynbna shen,” la ong u Bah A.L. Hek haba kren sha ki lad pathai khubor ha ka sngi Ba-ar jong ka taïew.
U la pynpaw ïa ka jingkyrmen jong ka party ban leh bha ha ka ilekshon GHADC, da kaba ong ba la dep pynbna ïa ka thup ba nyngkong bad ka jingpynkhreh ka dang ïaid shakhmat.
U la ong ba ka party ka dang pyrshang ban ïoh kyrtong na baroh 29 tylli ki Konstitwensi hynrei haduh mynta la ïoh aplikeshon tang na ki 19 tylli ki Konstitwensi, kane ka dei ka thup kyrteng ba nyngkong.
“Ngi don ka jingkyrmen ba ngin lah ban leh bha ha ka ilekshon GHADC ban wan” ong u Bah Hek.
Haba ïadei pat bad ka jingbym shah ïa ki kyrtong bym dei ki riewlum ban ïakhun ne thep vote, u Nongaiktien ka BJP u Bah M.H. Kharkrang u la ong ba ka BJP kam pat rai ei-ei halor kane namar ïa ka ‘notification’ dang shu pynbna dang shen.
Haba kylli, la hato ka dei ban khang ne em ïa ki bym dei ki riewlum ban ïakhun ïa ka ilekshon MDC, u Nongaiktien ka BJP u Bah M.H Kharkrang u la jubab da kaba ong ba ha ki por ba mynshuwa la shah ïa ki bym dei ki riewlum ban ïakhun ha Garo Hills.
“Ka seng hi kam pat don ka jingïakren kaba bniah ne shim ïa ka nongrim halor katei ka mat. Ka long kaba dang kloi ban ai jingmut ha kane ka kynti,” la ong shuh shuh u Bah M.H. Kharkrang.
