Nongstoiñ, Lber 03
Ka jingpyntrei ïa ka surok Nongstoiñ – Wahkaji kaba ïaid lyngba kiba bun ki shnong kala long shisha ka jingmyntoi bad jingkyrkhu kaba khraw ïa ki paidbah nongleit nongwan jong katei ka thaiñ kiba la mad ïa ki jingeh ha ki snem bala lah khamtam ïa kiba pang ba shitom hynrei kumba long mynta la katto katne bnai ka jingpyntrei ïa ki katto katne ki jingkieng bad ka jingpyntrei ïa ka surok ha ki katto katne ki bynta jong katei ka surok ki la sahkut, kaba la pynlyngngoh bad pynsah umdum ïa kiba bun balang bad buh jingkylli ba balei kane ka jingpyntrei kala shu sahkut noh.
Halor kane ka bynta, haba ïakren bad u President ka Hynñiewtrep Youth Council (HYC) West Khasi Hills District u samla Lumlang Kharsyiemlieh u la ong, ka seng ka pynpaw ïa ka jingsngewdiaw ïa ka jingsuki palat ban pyndep ïa ki surok hapoh Town Area Lyngba artylli ki projek kiba heh.
U samla Lumlang u la ong ruh ruh ba ka kompeni kaba dei ban trei ïa ka surok Nongstoiñ – Rambrai ïa ka jingkieng ryngkat ka surok ha Tiewsaw hajan jong ka ophis ka KHADC Nongstoiñ kala pynsahteng slem ha kaba kane kala ktah ïa ka ïaid ka ïeng ha ka thaiñ.
Shuh shuh u la ong ruh ba ka kompeni kaba pyntrei ïa ka surok Nongstoiñ sha Wahkaji, ka jingkieng ha Photkynthei hajan ka District Jail kala sahkut ryngkat ka surok haduh mynta ym pat dep siang rong bad ym tang katta ka surok hajan Kynroh, ha Nonglwai kumjuh ruh ka jingkieng la shu ieh khlem da don ba pyntrei shuh haduh mynta bad kane ka pynlyngoh haduh katta katta ïa ka seng bad ïa ki nongshong shnong ka thaiñ.
U la samla Lumlang u la pynpaw ruh da kaba ong, “Ngi ïohi ba kine ki kompeni kim kotbor ban trei hynrei ki shu wan ap Installment beit na ka Sorkar ban ai ‘Running Bill’ hynrei kim shym la don ïa ka bai kheng”.
Shuh shuh u la ong ruh ba ka seng ka pynpaw ïa ka jingsngewdiaw halor kane bad shen kan sa leit ban ïakynduh ïa u Deputy Commissioner ka West Khasi Hills ban pynsngew halor kane bad lada kine ki kompeni kim leh eiei ha kine ki khyndiat sngi, ka seng kan leh da kaba tyngeh namar kane ka jingpynslem ki dei ki dak ba ki ñion beiñ ïa ki paidbah.
