Shillong, Lber 03
Hadien ka jingmih na ki jingkynthoh ïa ka Bharatiya Janata Party (BJP) halor ka jingkren pynïapher niam da u Sunil Deodhar ha kawei ka jingïalang kaba la pynlong ha ka shnong Pynter, na ka liang ka BJP Meghalaya, ha ka 03 tarik u Lber, 2026, ka la mih shakhmat ban ai ka jingpynshai halor kane.
Haba kren sha ki lad pathai khubor, u Bah M.H. Kharkrang, nongaiktien ka party u la ong ba u Sunil Deodhar um don bynta eiei bad ka party da kaba pyntip ba baroh ki nongïalam ki pynrem jur ïa ka jingkren jong u.
U Bah M.H. Khar-krang u la pynshai ruh ba u Deodhar um don jingïadei bad ka Megha-laya unit jong ka party bad pynpaw ba ym don u wei ruh u nongïalam ka BJP na kano-kano ka jaka ha ka ri uba la kyrshan ïa ki jingkren jong u.
“Ka BJP ka burom ïa baroh ki niam ha kane ka Jylla bad kum ka party ka kiar ban kren kum kitei ki jingkren,” u la ong.
“Ka seng ka pynpaw ïa ka jingnoh synñiang kaba khraw jong ka jaitbynriew Khristan sha ka roi ka par ha ka imlang sahlang, ka kolshor bad ka pule puthi jong ka Meghalaya. Nga pynpaw ïa ka bynta jong u Thomas Jones ha kaba pynroi ïa ki dak Khasi bad ka la ithuh ïa ka jingnoh synñiang ha ka ban seng ïa ki jaka pule ha kylleng ka Jylla. U la ai ka jinghikai jong u Jisu Khrist, kiba pynshong nongrim ha ka jingïeid bad jingsngewrit, bad ki la ïarap ban pynwan dur ïa ka Meghalaya sha kawei na ki Jylla ha ka ri,” la ong shuh u Bah H.M. Kharkrang.
U Bah Kharkhrang u la pyntip shuh-shuh ba u President ka BJP jong ka Jylla, u Rikman G Momin u la ujor da ka jingpyrshah kaba jur sha ki nongïalam ba heh duh jong ka party, da kaba batai ïa ki jingkren jong u Deodhar kum kiba “sngewsih.” Ki nongïalam ki la shimkhia bha ïa katei ka kam.
Haba pynskhem biang ba ka Meghalaya BJP kam kyrshan ïa ki jingkren kiba pynmih jingïakynad, u Bah Kharkrang u la ban jur ïa ka jingkular jong ki ban burom ïa baroh ki niam. Da kaba kdew ruh ba u Myntri Rangbahduh ka ri u Narendra Modi u la ju ai burom ïa u Jisu Khrist ha ki por rakhe Khristmas, kaba pyni ïa ka jingburom jong ka seng ïa ki jingsngew Khristan.
Da kaba kubur ba katei ka jingkren ka la pynsngewsih ïa ki dkhot jong ka jaidbynriew Khristan, ka BJP Meghalaya unit ka la pynthikna ba kan nym shah ïa kano-kano ka jingleh ne ka jingkren kaba pynjah burom ïa kano-kano ka niam.
Ka BJP ka la kyrpad ïa ki paidbah ba kim dei ban shah pynngop ha ki jingpyrshang ban pynjah burom ïa ka dur jong ka, da kaba pynskhem ba ka bat ïa ki jingïatylli ha ka imlang sahlang ha ka Jylla.
