Shillong, Lber 04
Ka Hill State People Democratic Party (HSPDP) kan sa shong ïa ka jingïalang jong ka Central Executive Committee ha ka 17 tarik mynta u bnai Lber 2026.
Haba ïakren bad u Bah Panbor Ryntathiang uba dei u Secretary ka HSPDP u la ïathuh ba ha ka CEC ka ban long ha ka 17 tarik mynta u bnai kin sa ïakren ïa ka MP ilekshon shiteng samoi.
U la ïathuh ba ha kane ka CEC ki nongkitkam kin sa ïakren ruh ïa kiwei ki kam jong ka seng na bynta ban pyntyllun ïa ki kam nangne shakhmat.
U la ïathuh ba haduh mynta ym pat don ki seng saiñpyrthei ki ban pan jingkyrshan ha kane ka ilekshon shiteng samoi.
Shuh shuh u la ïathuh ba ka HSPDP ka dang don ha ka RDA hynrei kan ïakren shwa ha ka CEC hashwa ban ïakren hapoh ka RDA.
Kumban shu pynkynmaw ka HSPDP kaba don ha Regional Democratic Alliance bad ka UDP, ki la sei ïa u Bah Robertjune Kharjahrin kum u kyrtong ïamonlang ha ka ilekshon MP Lok Sabha ha u snem 2024 hynrei u la shah rem noh.
Ka jingpynkhreh ki seng saiñpyrthei ban sei kyrtong biang ka dei hadien ka jingkhlad noh u Dr. Ricky AJ Syngkon, u MP Lok Sabha uba la jop na ka VPP.
Na ka liang ka State Election Committee ka VPP ka la tyrwa ïa ka kyrteng u Dr. Batskhem Myrboh uba dei u nongaiktien ka VPP ban pan jingmynjur na ka State Executive Committee.
