Shillong, Lber 04
U President ka Megha-laya Pradesh Congress Committee (MPCC) uba dei ruh u MP barim ka Shillong, u Bah Vincent H Pala u la ong ba ka seng jong u kan nym pat ïakren ïa ka ilekshon MP shiteng samoi tad haduh shibnai hadien ka jingkhlad noh u MP Dr. Ricky AJ Syngkon, da kaba kynthoh ïa ka VPP ba ka la ïaid kloi.
“Ki bahaïing hasem jong u ki dang sngewsih, bun ki briew ki dang wan jngoh (sha ka jaka sah jong u),” la ong u Bah Pala.
“Ngam sngew ba ka long kaba dei ban kren politik ha kane ka por ba mynta,” u la ong da kaba kdew ba ka dang don long tang kumba 12-15 sngi naduh ba u Dr. Ricky Syngkon u la khlad noh.
“Nga kwah ba ïa kane ka kam ban ïakren hapoh ka seng, bad haduh mynta ngim pat rai”, u la ong.
U Bah Pala u la ong ba ka Congress kan ap ym duna ïa ka shi bnai shwa ban jer kyrteng ïa u kyrtong, da kaba ban jur ba kam pat don kano kano ka jingïakren hapoh jong ka Congress haduh mynta.
Haba kylli, une u nongïalam ka Congress u la ong ba ka Voice of the People Party ka la leh klet noh ïa ki kyndon sngewsih da kaba kren kloi halor ka ilekshon Lok Sabha shiteng samoi tang hadien katto katne ka jingïap jong u Dr. Ricky Syngkon.
“Nga sngew ba ka VPP ka la klet ba u la khlad noh mynta dang tang 12-15 sngi. Ban ïakren ïa ka saiñ pyrthei, nga hi nga sngew ba ka dang kloi palat. Ngam tip kumno ka VPP (ka la shim ïa ka rai kumne kloi),” u la pynpaw.
Ka State Election Committee jong ka VPP ka la tyrwa ïa ka kyrteng jong u Nongaiktien ka seng u Dr Batskhem Myrboh kum u kyrtong na ka bynta ka ilekshon MP shiteng samoi sha ka State Executive Committee ba kan ai ka jingmynjur.
