Ranchi, Lber:
Ki khubor halor ka jingshah rahbor jong ki khynnah ki la pynmih ïa ka jingtieng jingsyier ha Jamtara, kaba la pynlong ïa ka jinghiar jong ki khynnah skul ha ki skul primary sorkar ban leit skul ha kine ki sngi ba la dep.
Ka jingsheptieng ka la saphriang kylleng ka Gopalpur Panchayat bad ki shnong ba marjan, ha kaba ki don ki nongshong shnong kiba thiah miet ban peitngor.
Ka jinglong jingman jong ka jingbym shngaiñ ka la pynlong ïa ki nongshong shnong bad ki nongïalam shnong ban pynlong jingïalang, ha kaba la paw ba ki khubor kiba la saphriang ha ka shnong Dudh-Kevda ki la pynmih ïa ka jingtieng bad ktah beit ïa ka jingleit skul.
Katkum ki khubor, ka jingleit skul jong ki khynnah rit ka la hiar kumba 10% ha kine ki sngi ba la dep.
Ki nongshong shnong ki la ong ba ka jingjan jong ka Jamtara sha u pud u sam jong ka West Bengal, ryngkat bad ka jingleit jingwan jong ki briew kiba nabar, ka la pynmih ïa ka jingsuba bad jingtieng.
Ka jingshah kem dang shen jong uwei u briew uba donkti bad ka jinglap ïa ki tiar kiba suba na u ka la nang pynjur shuh shuh ïa ka jingsngewkhia.
Ha katei ka jingïalang, ki nongshong shnong ki la kyntu ïa ka bor synshar ban pynjur ïa ka jingpahara ha shilynter u pud u sam jong ka West Bengal bad ban ithuh ïa ki briew ki bym lah ban ithuh ne kiba don jingduna ha ka jingmut jingpyrkhat kiba ïaid kai ha katei ka jaka, da kaba phah ïa ki sha ki jaka ri ne sumar ïa ki lada donkam. La buh jingkylli ruh shaphang ki jingpynbeit ïa ka jingpahara ha ki skul.
U khlieh shnong barim u Manoj Soren u la ong ba 8 tylli na ki 10 tylli ki skul kiba don ha Gopalpur Panchayat kim don kynroh pud.
Ki lynti ban leit sha ki katto katne ki skul ki ïaid lyngba ka khlaw kaba jylliew, kaba pynlong ïa ki jingsngewkhia jong ki kmie ki kpa ban sngewthuh.
U BDO jong ka Jamtara Block u Abhiswar Murmu u la ong ba ki khubor hamsaïa ba don ki khynnah tuh ki la wanrah ïa ka jingsyier.
“Ka long kaba tynrai ba hadien ba la saphriang ki khubor tuh ki khynnah, ki kmie ki kpa ki sngew artatien ban phah skul ïa ki khun rit jong ki, khamtam ha ki jaka nongkyndong.Namar ka jingbym don jingtip, ki khubor ki saphriang stet bha ha ki jaka nongkyndong”, u la ong.
U Deep Naryan Mandal uba dei u nonghikai ha Khairbani High School ha Jamtara u la ong ba kitei ki khubor hamsaïa ki la ktah ïa ka jingpoi skul. “Shisha ki briew ki sngewkhia ïa la ki khun, namar kata, ka jingwan skul jong ki khynnah rit ka la hiar bha ha ki skul,” u la ong.
Ha ka miet jong ka sngi U Blei, ki trai shnong ha Dudh-Kevada kiba hap hapoh ka Gopalpur Panchayat, ki la suba ba uwei u briew u dei u nongkit khynnah, kumba la pynshisha la ong ba ki la thombor pyrshah ïa u.
Ha kawei pat ka jingjia ha ka lah sngi U Blei, la ïohi ba uwei u briew uba na Bihar, u ïaid wir ha Udalbani Panchayat. Ki nongshong shnong ki la bat ïa u bad pyntip sha ki pulit.
U ophisar ba dei peit ïa ka Sadar Police Station u Manoj Kumar Mahato u la ïathuh ba ha baroh ar tylli ki jingjia ki briew kiba la shah bat hadien ka jingkhmih bniah, la shem ba ki dei kiba don jingshitom ha ka bor pyrkhat bad ki la ïaid kai sha ki shnong ki thaw.
Baroh arngut kim shym la lah ban pynpaw shai ïa ka kyrteng ne jinglong jingman jong ki.
Hadien kine ki jingjia, na ka liang ka bor synshar distrik ka la pynjur ïa ka jingpahara bad pynlong ruh ïa ka jingpynsngewthuh paidbah khnang ban ïada na ka jingshah pynmynsaw ïa ki briew kiba lui lui.
Ha u bnai Rymphang, ym duna ïa ka 12 tylli ki jingshah thombor ha kylleng ka Jharkhand hapoh san sngi, ha kaba uwei u briew u la ïap ha Chatra bad katto katne ngut kiwei pat ki la mynsaw jur.
Watla ki Pulit ka Jharkhand ki la pynpaw ba kam don satia kano kano ka jingpynshisha ba ka don ka kynhun runar kaba la pynbeit ryntih, hynrei ki khubor ba la pynmih da ki nongïalam WhatsApp ki bym pat lah ban pynshisha ki la pynmih ïa ki khubor kiba la wanrah ïa ka jingtieng jingsyier ha kylleng ka jylla.
