Shillong, Lber 04
Ka phlim Khasi ba la ai kyrteng “Ha Lyngkha Bneng” kaba dei ka phlim kaba la jop ha bun tylli ki khusnam ba na ka ri bad shabar ka ri India, yn sa pyni paidbah naduh ka 6 tarik haduh ka 11 tarik u bnai Lber 2026 ha U Soso Tham Auditorium Shillong.
U tyngshop (Actor) jong kane ka phlim u Bah Melvin J Mukhim u la batai khyndiat ïa ka jingmut jong ka phlim “Ha Lyngkha Bneng” kaba u la ong ba kane ka phlim ka dei kaba kren shaphang ka jingïadei u briew kumjuh ka jingwan ki briew na ki thaiñ nongkyndong sha sor ban wad jingbylla ban kamai jakpoh.
U Bah Melvin u la ïathuh ba ka dor jong ka tiket ka long T. 150 bad T. 250 hynrei kyrpang na bynta ki khynnah pule ka dor tiket kan long T. 100 kumjuh ruh ba kin rah ryngkat ka ID skul khnang ba kan pynsuk ïa ka rung ka mih.
Shuh-shuh u la ïathuh ba ïa kane ka phlim la wan pyni ha kiba bun tylli ki ri jong ka pyrthei bad kaba la jop ruh bun tylli jingïakop ha ki tamasa pyni phlim, kane ka jinglah ban pyni ïa kane ka phlim ha ka Jylla lajong ka long kaba sngewkmen shikatdei ba ki paidbah ka Jylla kin ïoh ban sakhi ïa ka jingitynnad bad ban tip ïa ka jingmut jong kane ka phlim.
Khyndiat u la ïathuh ïa ka jingïoh jingkyrshan bad jingïaroh jong ka phlim ha ka jingleit ban pyni ha kiwei ki Ri, kaba la pynkyndit bad pynlyngoh ruh ïa ki ba don bynta ha kane ka phlim. U Bah Pradip Kurbah uba long u nongshna (Director) jong ka phlim u la khot bad wer ïa ki paidbah ka Jylla ban wan sakhi bad ban wan ai ka jingkyrshan ïa kane ka phlim ka ban long ka jingai mynsiem ïa ki nongak, ki nongshna, kiba pynmih ïa kane ka phlim bad baroh kiba don bynta.
