Khliehriat, Lber 04
Kawei ka longkmie kala duh ei ïa la ka jingim, katba ar ngut kiwei pat kila lait im da ka said ha ka jingjia aksiden kaba la jia ha ka shnong Byndihati, East Jaiñtia Hills District hadien ba ka kali kaba ki shong kala shah ban ha ka trok kit dewïong kaba thmu pynpoi ïa u dewïong sha ki karkhana dewbilat ha katei ka district.
Kane ka jingjia aksiden kala jia ha ka miet 4 tarik Lber ha ka por kumba 8 baje eiei, ha kaba kane ka trok kit dewïong kaba thmu ban leit sha ki karkhana dewbilat kumno re kumno kala kylla bad ban ïa ka kali Maruti Car kaba na Jowai, katba kawei pat ka Maruti Gypsy kala shah ban na ka bynta ba shakhmat jong ka kali.
Ka khubor ka ïathuh ba kane ka Maruti Car ka dei kaba wan na ka jingkhawai sngikha na ka shnong Wahiajer Narpuh. Ki don 3 ngut hapoh ka kali, ar ngut ki kynthei bad u nongñiah ka kali.
Kane ka longkmie kaba la khlad la tip kyrteng kum ka Kong Ester Liting kaba trei ha DM&HO, West Jaiñtia Hills District ba na ka shnong Khimusniang, Jowai. Baroh kine ki lai ngut hapoh ka kali ki dei shi ïing shisem, kynthup u nongñiah uba dei u lok jong ka Kong Ester bad ka para jong ka.
Ki paidbah kiba ïohi bad ki bor pulit kila pyrshang ban ai ïa ka jingïarap ban sei mar mar ïa ki briew da kaba pyndonkam da ka puh shilum ban pynkynriah ïa u dewïong.
Hadien ba la sei ïa ki briew la pynkit ïa ki sha Civil Hospital Khliehriat bad ki pulit ruh kila shimti ïa ka case bad pyndep ïa ki jingdonkam katkum ka aiñ.
