Shillong, Lber 04

Ka lympung 5th District League T20 Cricket Tournament 2026 jong ka East Khasi Hills Cricket Association ha ka sngi ba 11 jong kane ka lympung kala bteng da ka jingïalehkai ha ka sien kaba 23 da ka jingïalehkai hapdeng ka Laitkynsew Mission Club bad ka Saitsohpen Veteran Legend.

Ha ka jingkynting pisa la ïoh kam trai da ka Saitsohpen Veteran Legends bad ka la jied ban tied nyngkong, ka la lah ban kamai haduh 117 ron na ki 19.5 over. U Keithwill Lyngdoh u ba long u nongtied bol ba kham kynsai u la ïoh 45 ron katba u Jesper Malngiang u la khur 2 wiket.

Ha ka pali beh ïa ka thong ka Laitkynsew Mission Club ka la ïoh da 118 ron na ki 4 wiket ha ki 13.4 over. U Moulding Kharpuri u la ïoh 30 ron katba u Shngain Kynta u la khur 2 wiket.

Ha ba kut ka jingïalehkai ka Laitkynsew Mission Club ka la jop noh da 6 wiket bad ïa ka nam ‘Player of the Match’ la ïoh da u Jesper Malngiang.

Ha ka jingïalehkai kaba bud kata kaba 24, la lehkai da ka Cricket Smit pyrshah ïa ka Pomshutia CC.

Ka Pomshutia ka la ïoh kam trai ha ka jingkynting pisa bad ka la jied ban tied nyngkong, ka la ïoh 80 ron na ki 10 wiket ha ki 19.5 over. U Pynbianglang Pyngrope u la ïoh 25 ron katba u Syntem Kamwamut Nongneng u la khur 3 wiket.

Ha kaba beh ïa ka thong ka Cricket Smit ka la ïoh 81 ron na ki 8 wiket ha ki 16.4 over, u Raymond Thabah u la ïoh 19 ron katba u Donkupar Syiemlieh u la ïoh ban khur 3 wiket.

Ka Cricket Smit ka la jop noh da 2 wiket ha ka jingïalehkai bad ïa ka nam ‘Player of the Match’ la ïoh da u Syntem Kamwamut Nongneng.