Shillong, Lber 04
U MLA ka Bharatiya Janata Party (BJP) na Pynthorumkhrah Constituency u Bah AL Hek u la pynpaw ba ka ‘State Reservation Policy Meghalaya’ ka dei ban buh hakhmat eh ïa ki longïing kiba don ha ka thup ‘Below Poverty Line’ (BPL) bad ïa kito ki longïing ki bym don nongtrei Sorkar.
Haba kren sha ki nongthoh khubor u Bah Hek u la ong “Nga pynkynmaw biang ïa kaei kaba nga la pynpaw hapoh ka ïingdorbar, lada bishar bniah ïa ka ‘Reservation Policy’ dei ban pynthikna bad kynthup ïa ki longïing kiba don ha ka thup BPL khamtam kito ki bym don napdeng jong ki kiba treikam Sorkar.”
Shuh-shuh u la ong, la ka long 40-40-20, um don kano-kano ka jingpyrshah hynrei u ïeng ha ka jingmut jong u hi, ba ka jingai bhah kan dei ban leit sha ki longïing kiba duk ki bym pat ju ïoh kam Sorkar bad dei ban ai ka bhah ba kyrpang ïa ki.
U Bah Hek u la kam ba um shym la ïohi ïa ka kaiphod jong ka Expert Committee ba la wanrah da ka Sorkar namar u khlem ïoh ban ïashimbynta ha kane ka dorbar ba dang shu dep namarba u don ha pdeng ka met bym koit bym khiah.
Haba bynrap u la ong ba lada pyrkhat ïa kane ka mat, dei ban ai ka bhah kyrpang ïa ki longïing bym pat don ba treikam Sorkar khnang ba kine ki longïing ruh kin ïoh kam Sorkar lang.
