Shillong, Lber 04
Halor kiba bun ki jingeh ba ki nongri jingri jong ka thaiñ Bhoirymbong ki ïakynduh ha ka kam ri jingri, ha ka sngi Balang ki la pynlong ka jingïa-kynduh lang ban ïaphylliew jingmut ha ryngkat ki nongïalam ka Hills Farmers Union bad kyrpad ban pynsngew lem ïa ki jingeh ha ki bor Sorkar.
Ha kane ka jingïalang la ïadonlang u Bah Allfondbirth Kharsyn-tiew General Secretary HFU ha ka jingïadonlang u Bah Pynshai Masha-ring General Secretary HFU Ri Bhoi District kumjuh ki dkhot, ki nongrep bad ki nongri sniang ha ka thaiñ.
Ki jingeh ba ki nongri sniang ki ïakynduh ka long haba ïadei ka jingshah khñiot dor palat ha ka por ba die sniang, katba ki jingbam sniang ki kiewdor, kumjuh ruh ka jingbymlah shuh ban pynïaid ïew ha ki snem ba la leit, kaba la pynlong ka jingeh kaba khraw ïa ki nongrep bad nongri jingri kiba im bad ba shaniah na kane ka kam.
Kane ka jingeh ka la ktah shi katdei ïa ki nongrep ha kaba kim lah shuh ban pyndap ïa ki jingdonkam kum ha kaba phah skul ïa ki khun bad kumta ter-ter.
Ki nongrep ki la pynsngew ba ka daw jong ka jingbym lah shuh ban pynïaid iew ïa ki sniang ka long namar ka jingjur ka jingpoi ki sniang kiba nabar bad ki nongot doh ki la thied ïa kiba wan nabar bad khñiot dor pat ïa ki sniang ba na ka Jylla.
Halor jong kane ki la kyrpad ïa ka Sorkar ban sngew ban sngap lem ïa ki jingeh khamtam ban tehlakam ïa ka jingwan palat ki sniang ba nabar bad ban kyntiew ïa ka dor, khnang ba kiba im bad ba shaniah na ka kane ka kam kin lah ban kyrshan ïa ka ïing ka sem.
Haba ïadei kine ki jingeh da kawei ka sur jong ki nongrep na them Ri Bhoi ki la rai ban leit pynsngew ïa ki jingeh jong ki sha ka Sorkar da kaba kin leit ban ïakynduh ïa u myntri ka tnad Animal Husbandry and Veterinary jong ka Sorkar Jylla ha ki sngi ban wan.
