Shillong, Lber 04
U State-President ka National Peoples’ Party (NPP) uba dei ruh u Symbud Myntri Rangbah ka Jylla, Bah Prestone Tynsong u la kynmaw burom ïa u nongseng ka NPP, u P.A. Sangma ha ka lyngkhuh sngi ïap ba 10 snem jong u, da kaba pynkynmaw, kumno ka jinglong jong u Lamphang barim ka Lok Sabha ka la rah ïa ka nam jong u shaduh ki kyrdan ba shabar jong ka Meghalaya.
“Ha ka por ba nga la leit sha New York, ki NRI kiba pynïaid ïa ki kompeni ba heh hangtei ki dang kren shaphang u P.A. Sangma. Ki ong ba ym don shuh uba kum ma u – ym don nongïalam na Meghalaya uba la kynjoh sha kata ka kyrdan,” la ong u Bah Prestone sha ki nongtrei ka seng ha ka Sngi Balang.
“Dei na kata ka daw ba bun na ngi, ngi la pynïasoh bad ka NPP, ban pyntikna ïa ka jingïai bteng ha ryngkat ka jingkitkhlieh,” u la ong.
Haba phai biang sha u snem 2014, haba u Sangma u la shah jied biang kum u MP na Tura, u Bah Prestone u la batai shaphang ki jingïaleit kai sha ïingsah jong u Sangma ha Delhi ha ka por mynmiet.
“Man ka por ba nga poi Delhi, nga ju ‘phone’ ïa u. Nga la sah ha Meghalaya House, u don hajan, bad ha ka por 8:30-9 baje mynmiet nga ju leit sha ïing jong u. Wat u James Sangma ruh um tip haduh katno ka jingïajan jong ngi,” u la ong.
Kata ka jingïadei paralok, u la ong, ka la pynlong ban ïoh “Yellow Card” na ki nongïalam ka Congress ha katei ka por.
“Hynrei ïa u P.A. Sangma la jied da U Blei. U la ong ïa nga, ‘Phi long kum u para khatduh jong nga. To trei shitom bad pyntikna ïa ka jingmyntoi jong ki ‘riewlum – na Meghalaya, ka Thaiñ Shatei Lam Mihngi bad ka ri baroh kawei – kan ïoh jingïada. Ngam shym la sngewthuh bha ha katei ka por; nga pyrkhat ba ka jingshakri jong nga kan kut tang ha Meghalaya. U la pyni ïa nga ba nga dei ban long shibynta jong ka jingïohi jngai kaba ïar,” ong u Bah Prestone.
U Bah Prestone u la ban jur ba ka khubor jong u Sangma – “One North East, one voice for tribals in India” – ka la paw ha u haba u pule ïa ka riti synshar ka NPP ha u snem 2018.
“Ngin ym ïoh shuh ïa u nongïalam kum ma u. Ka pynsngewsih ban ïohi ba ki briew ki ther maw ïa ka riti synshar jong ka seng, haba kum ki rit paid ngi dei ban ïada ïa ka mishon kaba u la iehnoh ha ngi,” u la ong.
U la pynpaw ka jingkyrmen skhem ba hapoh jong u Conrad K. Sangma, ka seng kan nang pynkhlaiñ shuh-shuh ïa ki pateng nongrim jong u P.A. Sangma.
“To ngin sakhi ba ki jingkyrkhu lyngba ka NPP kin poi sha ka ri baroh kawei,” u la ong.
Haba ai ka jingburom kaba khraw ïa la u kpa ba la khlad noh, u National Working President ka NPP bad Myntri kam pohïing barim, u James K. Sangma u la ong ba, “ka jingburom kaba shisha ïa u nongïalam kam dei tang ka jingkynmaw hynrei ka jingbteng ban pyntyllun” ïa ka thong jong u.
“Ka jingïohi jngai jong u ha ka dur jong ka NPP ka don ïa ka bor ban rah shakhmat namar ka nongrim kaba skhem kaba u la buh,” la ong u James.
“Kata ka nongrim kan rah ïa kane ka seng shakhmat…mynta, ngi la poi sha ki katto-katne ki kyrdan na ka jingsdang kaba rit bad ka pyni ïa ka jinglah kaba ngi baroh ngi don,” u la ong.
Ha kajuh ka por, u la ai khublei ïa ki nongpynïaid bad ñiew ïa kane ka prokram kum ka jingrakhe ïa ka jingim jong u Sangma ha ka jaka ban ïa sngewsih.
“To ai ba kan ym long ba ngi kynmaw ïa ka jingsngewsih, hynrei da kaba ngi peit ïa ka jingim jong u bad ba ngi rakhe ïa ka,” u la ong.
Na ka liang u Treasurer ka NPP, Bah Daniel Thangkhiew u la pynkynmaw ïa u P.A. Sangma kum u nongïada ïa ka jinglong kyrpang ki jaidbynriew ‘riewlum bad ka hok jong ki Khristan.
“Nga la leit lang bad u ha ka por ba jia ka jingjia ha Langpih, ngi la leit lyngba ka surok sha ki jaka ba don ka jingïakynad hapdeng ki Garo-Rabha,” la ong u Bah Daniel.
“Na ka jingshem shimet jong nga, la ieid ïa u da baroh, u la buh nuksa, bad u la ïakhun na ka bynta ka jinglong ‘riewlum ba kyrpang jong ngi haduh ka sngi kaba u la khlad noh,” u la ong.
U la bynrap, “U la ïakhun na ka bynta ki Khristan ha kane ka ri, u la kob hapoh Ïingdorbar haba ki briew ki kyntait ban pdiang ïa ki skul mishon, bad u la thoh sha u Myntri Rangbahduh bunsien halor ki mat kiba ki para Khristan jong ngi ki dang ïakynduh haduh kine ki sngi.”
Haba pynkynmaw ïa ki kynta ba khatduh jong u Sangma, u la kdew ba u Myntri ka Sorkar Pdeng, u Piyush Goyal “u la phah khot ïa ka kali kit nongpang bad ïarap ban rah ïa u Sangma sha ‘hospital’.”
“Ngam dei mano-mano u ban kren shaphang ka jinglong jong u – ka pyrthei baroh kawei ka tip – hynrei u la ïeng skhem haduh kaba kut,” u la ong.
