Kyrmen skhem ka Congress ban leh bha ha ka ilekshon GHADC

Shillong, Lber 04

U khlieh nongïalam ka Congress, u Bah Vincent H. Pala u la pynpaw ïa ka jingkyrmen skhem ba ka seng kan sa leh bha ha kane ka ilekshon ban wan sha ka Garo Hills Autonomous District Council (GHADC) ka ban long ha ka 10 tarik u Ïaïong.

Haba kren halor ka jingpynkhreh jong ka Congress (ha ka Sngi Balang), u Bah Pala u la ong ba ka seng ka la pynbna kyrtong na ka bynta baroh 29 tylli ki konstitwensi jong ka GHADC bad ka khmih lynti ban ïoh jingmyntoi namar ka ‘anti-incumbency’ ne ka jingbym hun ïa ka jingtreikam jong ka National People’s Party (NPP) kaba don ha ka bor synshar.

“Ngi pyrshang katba lah na ka liang jong ngi bad ngi kyrmen ba ngi lah ban leh bha,” u la ong bad bynrap, “Ngi ngeit skhem ba ngin leh bha ha kane ka kynti namar ka jingpyrshah ïa ka NPP ka long kaba jur bha.”

Halor ki nongïakhun pyrshah, u Bah Pala u la kubur ïa ka bynta ba ïadei bad ka TMC.

“Ka TMC ka don la ka jong ka bynta namarba u Dr. Mukul Sangma u dei u nongïalam ba paw ha Ri-lum Garo. Ka TMC, ka BJP bad baroh kin ïoh ïa la ka bhah,” u la ong.

Haba kylli halor ka jingpynbna jong ka GHADC – kaba donkam ïa ki syrnot ‘Scheduled Tribe’ ban ïakhun, u Bah Pala u la ong, “Katba ym pat don ba rah ïa ka hakhmat ka ïingbishar, ka dang sah. Lada don kiba rah, te tang hangta hi ngin sa tip.”

“Ngam tip la ki la ïoh ne em ïa ka jingmynjur jong u Lat. Katba ym pat don ba tynjuh ïa ka, ka long kaba dei,” u la ong.