Guwahati, Lber 04
Arngut ki briew kiba dei ki shiparalok ki la khlad noh hadien ba ki la ngam jyllop ha kawei ka wah kaba don ha Gunpati, kaba hap ha khappud ka Jylla Meghalaya bad Assam kaba dei ruh ka jaka jngohkai pyrthei kaba paw ha ka thaiñ Rani Bari, Jirang.
Katkum ka khubor ba la ïohlum, la ïathuh ba kine ki arngut ki dei kiba la tip kyrteng kum u Jayrani Wari bad u Wenar Boro kiba don ha ka rta kaba 33 snem bad kiba na ka shnong Kharghuli, Guwahati, Assam.
Shuh shuh ka khubor ka ïathuh ba san ngut ki shi paralok ki la mih na Guwahati ban leit kai sngewbha bad ha kaba ki la sangeh ha katei ka jaka jngohkai ha Gunpati bad ki la ïajngi ha ka wah kaba don ha katei ka jaka hynrei kine ki arngut kila ngam jyllop namar ka jingbym nang jngi.
Ki paralok kila pyrshang ban leit ïarap hynrei namar ka jingjylliew ka wah, kim shym la lah satia ban sei ïa ki. Da ka jingleit ïarap ki nongshong shnong, la ïoh sei ïa kawei ka met bad hadien da ka jingpoi ka kynhun National Disaster Response team, la ïoh ban sei sa ïa uwei.
Ki Pulit ka Ri-Bhoi kila hiar sha katei ka jaka ban pynlong ïa ka jingtohkit bad ïa ka met la pynkit noh sha Civil Hospital Nongpoh ban leh ïa ka post mortem.
