Shillong, Lber 04
Ki khlur boxing ba pawnam, u Floyd Mayweather Jr. bad u Manny Pacquiao, ki la rai ban ïakhun biang ha ka jingïakhun ‘rematch’ kaba khraw ha ka 19 tarik u Nailur ha ka madan Sphere, Las Vegas. Ïa kane ka jingïakhun yn pyni lyngba ka Netflix ha satlak ka pyrthei.
Kane ka jingpynbna ka wan hadien katto katne sngi ba u Mayweather u la pynpaw ïa ka jingthmu ban wanphai biang hadien ba u la pynkhreh na ka bynta ka snem 2026 pyrshah ïa u Mike Tyson, ha ka jingïatreilang bad ka CSI Sports/Fight Sports.
Katba u Manny Pacquiao u rangkura ba paw ka ri Philippines, uba la wanphai biang ha madan boxing ha u snem ba la dep, u la ïakhun pyrshah ïa u WBC Welterweight, u Mario Barrios, kaba la kut ha ka jingïakhaid. U don ruh ka jingthmu ban ïakhun pyrshah ïa u Ruslan Provodnikov ha ka 18 tarik u Ïaïong ha Las Vegas.
Ka jingïakhun ba nyngkong jong ki ha ka 2 tarik u Jymmang (May), 2015, ka la kut ha ka jingjop u Mayweather. Kane ka jingïakhun ka la pynkhein ïa ki record boxing bad ka jingïoh kamai kaba palat $410 million.
U Mayweather (50-0, 27 KOs) u la shongthait ha u snem 2017 hadien ba u la pynliem ïa u Conor McGregor, katba u Pacquiao (62-8-3, 39 KOs) u la shongthait nyngkong ha u snem 2021 bad wanphai biang ha u 2025.
Baroh arngut ki nongïalehkai ki pynpaw ïa ka jingshaniah kaba khraw, bad u Pacquiao u la smai ban pynliem ïa u Mayweather ha kane ka kynti kaba nyngkong eh ha ka kam lehkai boxing jong u.
