Nongstoiñ, Lber 04
Ka kynhun ïalehkai Cricket jong ka Mawkawah CT ka la ïoh ban khur ïa ka jingjop ha ka jingïalehkai qualifier 2 jong ka Super Division ka lympung ïalehkai District Cricket League 2025-26 kaba la pynlong da ka West Khasi Hills District Cricket Association.
Kane ka nam jop jong ka Mawkawah CT kala wan hadien ba ka la pynliem noh bad jop da 2 wiket ïa ka Tiehsaw CT ha ka jingïalehkai qualifier 2 pyrshah kaba la long ha ka 4 tarik u Lber 2026 ha madan Mawrusyiar West Khasi Hills kaba la long shisha ka jingïalehkai kaba itynnad bad kaba ïakhaid bha.
Haba sakhi ïa kane ka jingïakhun hapdeng kine ki ar tylli ki kynhun ïa ka jingkynting pisa la jop da ka ka Mawkawah CT bad ka la jied ban bol (fielding) shuwa.
Ka Tiehsaw CT ha ba shim ïa ka bynta ban tied bad ban beh ïa ka thong ka la ïoh ban kamai 98 ron bad hap noh baroh ki 10 Wiket na ki 27.3 Over.
Nangta, ha kaba beh ïa ka thong ka Mawkawah CT ka la lah ban khur ïa ka jingjop bad poi 100 ron bad hap noh baroh 8 Wiket na ki 28 Over, kumta ka la pynlong ïa ka Mawkawah CT ban jop da 2 Wiket, bad u Mickey Marngar na ka Mawkawah CT u la ïoh ban khur ïa ka nam ‘Player of the Match’.
Shuh-shuh da kane ka jingjop ka Mawkawah CT ka la rung sha ka Final jong kane ka lympung bad kan ïakynduh pyrshah ïa ka Ladweitang SS&CC ka ban sa long la Sngi Thohdieng kata 06 Lber 2026.
