Shillong, Lber 04
Ki shipai Border Security Force (BSF) ki la hap ban siat shi kuli sha suiñ ban pynma ïa ki runar kiba la suba ba ki lah ban dei ki khar Bangladesh kiba ïaid tuh ha khappud.
Katkum ka khubor kaba la ïoh na ki pulit la ong ba u Coy Commander, F-Coy jong ka 50th Bn., BSF, BOP Beldoba ha South West Garo Hills u la ai ka jingujor ba ha ka 28 tarik jong u bnai ba la lah, ha ka por kumba 11.45 mynstep, ki shipai BSF ki la ïohi ïa ka jingïaid jong ki runar bym lah ban ithuh kiba don kumba 3 ngut eiei, ïa kiba la suba ba ki lah ban dei ki khar Bangladesh ha lynter jong ka khappud ka India bad Bangladesh.
Ban pynma ïa kine ki briew, ki BSF ki la siat shi kuli sha suiñ, ha kaba kine ki briew ki la phet krad noh sha ka bynta jong ka Bangladesh. Kham hadien na ka liang jong ki BSF ki la ïoh ban kurup noh ïa u kynja (ganja) uba khia shi kilo na katei ka jaka.
Ha kawei pat ka khubor na ki pulit la ong ba ha ka 1 tarik mynta u bnai, ha ka por kumba 8.30 mynmiet, ki pulit ki la ïoh bat noh ïa ki ar ngut ki nong Bangladesh, kata u Monirul Biswas bad ka Lovely Khatun ryngkat bad kawei ka kali Maruti S-Presso (ML05-AG-7472) kaba la ñiah da u Pynshaibha Khaii ha ka shnong Sohkha, West Jaiñtia Hills.
