Chennai, Lber:
Hapdeng ka por ba dang sahteng jong ka jingïakren ban ïasam shuki hapdeng ka seng DMK bad ka seng Congress, u heh nongïalam ka Congress u P Chidambaram bad u President ka TNCC u K Selvaperunthagai ki la ïakynduh ïa u Myntri Rangbah ka Jylla bad u President ka DMK u M K Stalin ha ïingsah jong u ha ka sngi Ba-ar ha ka jingpyrshang ban pynkut noh ïa ka jingsahteng ka jingïakren.
Ha kane ka ïalang la don lang ruh u MP ka DMK u Kanimozhi Karunanidhi.
Ki tyllong khubor ki ïathuh ba watla ki nongïalam ka DMK kim shym la nud ban pdiang ïa ka jingdawa jong ka Congress ban ïoh 34 tylli ki shuki ha ka ïingdorbar thawaiñ, hynrei ki la pynpaw ïa ka jingkwah ban tyrwa haduh 29 tylli ki shuki, nalor ar tylli ki shuki ha Rajya Sabha.
Ha kajuh ka por, ka komiti ba ïasam shuki jong ka DMK, ka la khot ïa ka Congress na ka bynta ka jingïakren kaba ar ha ka sngi Balang, ong u nongaiktien jong ka DMK.
Uwei u nongïalam ka Congress u la pynthikna ïa ka jingtyrwa jong ka DMK bad u la ong ba ka seng ka dang donkam shuh na kaba la pynbna bad mynta ki dang ïai ap ïa ka rai na ka kynhun nongïalam kaba kham ha khlieh.
“Ka Congress kan ïoh ïa kawei ka shuki Rajya Sabbha ha ka ilekshon kaban sa long ar snem, bad sa kawei pat yn tyrwa ha u snem 2028”, la ong ka tyllong khubor.
La sngewthuh ruh ba ka DMK ka la pynsngew ïa ka jingsngewtynnat jong ka ba ïa ka shuki Rajya Sabha dei ban ai sha u nongïalam ka seng Congress ha TN.
Hynrei u heh ka TNCC, u Selvaperunthagai, u la khot ïa katei ka jingïalang jong u Myntri Rangbah, kum ka “jingkynduh ba donburom”.
“Ka dei ka jingïakren kaba donburom. Ka jingïatehlok ka long kaba skhem bad ïa ka jingïakren ban ïasam shuki yn sa pynkut noh shen”, u la ong bad bynrap ba ym shym la buh por da ka DMK.
Ïa kane ka rai ban bujli ïa u Chidambaram la shim ha ka jingïakynduh jong ki heh nongïalam ka Sonia Gandhi, u Mallikarjuna Kharge bad u K C Venugopal hadien ba ka jingïakren ba la ïalam da u Girish Chodankar in-charge ka AICC Tamil Nadu kam shym la poi shano shano ruh.
La ïathuh ba u Chidambaram, u la pynlong ïa ka jingïakren lyngba ka durkhih bad ki nongïalam jong ka nongbah Delhi, shwa ban ïakynduh ïa u Myntri Rangbah.
Ha ka sngi U Blei, ki dkhot jong ka komiti ba ïasam shuki jong ka Congress, ki la pyntip sha ki heh shipai, ba ka DMK, ka long kaba skhem ban ai ym palat ïa ka 25 tylli ki shuki bad kawei ka shuki ha Rajya Sabha, ha kaba ka lah ban kiew sha ka 28 tylli ki shuki, hadien ba la ïamir jingmut bad u Myntri Rangbah.
U Chodankar, uba la kynnoh ba u la ai ïa ka thup jingkwah jong u, kaba 42 haduh 45 tylli ki seat sha ka DMK, la ong ba um nud ban ïapynbeit tang hapoh 34 seat.
Hadien kata, ki bor synshar jong ka Congress ki la pynlong ïa ka jingïamir jingmut bad ki MLA jong ka TN ha ka miet jong ka sngi U Blei ha kaba ki la kyrshan ban bteng ïa ka jingïatreilang bad ka DMK.
Ha kajuh ka por, haba ïakren bad ki nongthoh khubor ha Pudukkottai, u nongïalam ka DMK uba dei ruh u Myntri ba dei khmih ïa ka Natural Resources u S Regupathy u la ong ba ka Congress ka lah ban rung sha ka ïingdorbar thawaiñ tang lyngba ka jingïatreilang ba la ïalam da ka DMK. “Ka Congress ka tip bha ïa kane ka jingshisha”, u la ong.
