Shillong, Lber 05
U Bah Paul Lyngdoh u ba long kum u nongaibuit ka tnad Social Welfare u la ong ba ha ka taïew ban wan yn sa sdang ïa ka Village Defense Party ha Nongsohphoh Upper Mawprem kaba long kum shi bynta ka jingthmu jong ka Anti-Narcotic Task Force (ANTF) ban ïatreilang bad ki Dorbar Shnong ha ka ban ïa leh pyrshah ïa u drok.
Haba kren sha ki nongthoh khubor, u Bah Paul u la ong, “Ha kane ka janmiet hi, nga la ïakren bad u SP ka ANTF, ngi la ïaid shakhmat bad la rai ba ka Dorbar Shnong jong kawei na ki jaka ba kynrei bha u drok ha nongbah, kata ka Nongsohphoh Upper Mawprem ban sdang ïa ka VDP lane ka seng ban peit ïa ki shnong ki thaw bad ka ban sa sdang ha ka 13 tarik Lber.”
U la ong ba kan dei ka unit kaba ar kaba kum kane ha nongbah Shillong, ha kaba mynta ki don tang 12 tylli ki VDP.
“Ngi la pyrshang ban kyntu ïa ki Dorbar Shnong ban wan shakhmat ban ïasohlang bad ki tnad treikam bapher-bapher khnang ba ngin ïoh ïa ka bor ban ïakhun pyrshah ïa ki jingsniew da kaba ïatreilang ryngkat ba ki pulit ka Jylla,” la ong u Bah Paul.
U Bah Paul u la batai ïa ka “rukom treikam ba bun rukom” kaba kiar na ki jingpyntip paidbah namar ki jingpher jingmut ki paidbah, hynrei u la ong ruh ba ki jingkhynra ba dang shen bad ka jinglong jingman ka pynpaw ïa ka jingshimkhia ka Sorkar ban ïaleh pyrshah ïa u drok.
“Ngi la jam sha ki jaka ba thymmai kiba ngim shym la kynthup lang ha ki por ba mynshwa. Phin sa sngewthuh ba ka Sorkar ka shimkhia ha ka ban ïakhun pyrshah ïa ka jingma jong u drok,” u la ong.
Haba kylli shaphang ka kaiphod jong u MLA barim ka Manipur uba la shah kynnoh khaïi drok sha Meghalaya, u Bah Paul u la ong ba u la ïohi ïa kine ki khana hynrei un sa ïakren bniah bha shwa bad u Symbud Myntri Rangbah ba peit ïa ka tnad kam poh ïing.
