Shillong, Lber 05
Ki ophisar jong ka tnad Legal Metrology ka Sorkar Jylla ha ka sngi Palei jong ka taïew ki la leit ban talasi ïa ki dukan die tiar ha shilynter ka surok ha Keating Road.
Kane ka jingtalasi ki ophisar ka long kum shibynta ban wanrah ïa ka jingkhuid jingsuba ha ka ban die ïa ki tiar khlem da leh beaiñ ha ka dor ka mur, khnang ba kan long ka jingmyntoi ïa ki nongthied baroh.
Ka jingpynlong ïa kane ka jingtalasi ka long ruh ban khmih bniah ïa ki tiar kiba die ha kitei ki dukan ba hato ki pyndonkam ne-em ïa ki mar kiba don ka jingthoh Max Retail Price (MRP) nalor kiwei-kiwei pat ki jingdonkam kiba don ha ki kyndon ka Legal Metrology (Packaged Commodities) Rules, 2011 khnang ba ki paidbah kiba thied jingthied kin lait na ka jingshah thok ha ka dor.
Ki ophisar bad ki nongtrei jong katei ka tnad ki la rung ha man la ki dukan ha Keating Road bad la ïoh kurup ruh ïa bun tylli ki tiar kiba la die khlem da don ka MRP nalor kiwei-kiwei pat ki jingdonkam ha kaba na ka liang ki ophisar ki la shimti noh ïa kitei ki tiar mardor, ryngkat ruh ka jingshah daiñ kuna.
Ki ophisar ki la ïathuh ba ki nongdie ïa ki tiar baroh kidei ban don ïa ka MRP bad shisien ba la dep ban shna ïa ka MRP kim dei ban pyndam ne shna da kawei namar ka long beaiñ.
Ki la ong ruh ba lehse don ki tiar ba tang 200 tyngka hynrei ki die haduh 500 tyngka bad kane ka dei ka jingshim kabu ha ka dor die, kumta ka la pynlong ïa ki ban talasi khnang ba kan nym don shuh kum kine ki jingleh buit tuh ha ka ban die ïa ki tiar.
Haba kylli, ki la ïathuh ba kin nym lah ban khang ïa ki dukan die tiar hynrei ki shu bthah beit ba kin nym lah shuh ban die ïa kito ki tiar ki bym don ïa ka MRP.
La ïoh jingtip ruh ba ha kane ka sngi, na ka liang kiwei ki ophisar ha ryngkat ki nongtrei ruh ki la shim ïa la ka bynta ban pynlong ïa ka jingtalasi ha kiwei pat ki jaka ha Nongbah Shillong.
