Shillong, Lber 05
Uwei u samla ba dang 20 snem ka rta u la batbor ïa kawei ka longkmie kaba 66 snem ka rta ha kawei na ki shnong ha Ri Bhoi District kaba don ha khappud bad ka Assam.
Kane ka jingjia batbor jong utei u samla ka dei kaba la jia ha ka janmiet jong ka sngi U Blei.
Haba ïoh ban ïakren bad katei ka longkmie kaba la shah batbor dusmon ha utei u samla ka la ïathuh ba utei u samla u la ksih ïa ka haduh ba kan da ïap-thlep syndon.
Ka la ong ruh ba ha ka jinglong jingman kaba ym don hapdeng ka jingtip briew utei u samla u la thombor ïa ka bad pynkdiah ruh ïa ka kti jong ka.
La ong ba utei u samla u leit shongkai ha ïing katei ka longkmie bad bam ja miet ha ïing jong ka, hynrei ynda la dep bam, u la patan ïa katei ka longkmie sha kyrpong ïing bad leh ïa katei ka kam poh.
Katei ka longkmie ka la kyndit bynriew na ka jingïap-ler ynda la miet bha ha katei ka miet bad dei haduh ka sngi ba bud ba ka la phah khot bahaïing ban rah ïa ka sha CHC.
Hadien ba ki doktor ki la peit bniah ki la lap ba kane ka longkmie ka la shah batbor bad kumta la pyntip sha ki pulit bad kham hadien la ïoh jingtip ba u la leit aiti ïalade ha ki pulit.
“Une u samla u ju wan kai man ka por sha ïing bad ha ka sngi U Blei u la wan kai biang ha ka por kumba 5 baje eiei. Bad ha ka por ba u mut leit noh sha ïing bad shuwa ba ngan khang ïa ka ïing u la rung biang bad ksih ïa nga haduh ba ngam lait shuh tang ban kren ruh bad ïap thlep,” ka la ïathuh.
Kumta ka la ong ba ki pulit ki dei ban set beit ïa une u briew bad kam long shuh ba un wan sah biang sha shnong.
Halor kane ka jingjia, ki nongshong shnong katei ka shnong ki la mih shakhmat ban pynrem jur ïa utei u briew uba la leh ïa kane ka kam poh, da kaba dawa ruh ba ki bor jong ka aiñ ki dei ban pynshitom da kaba tyngeh ïa une u nongleh kam sniew.
