Srinagar, Lber:
Ki jingpyrkhing ha kaba ïadei bad ki jingwanrah jingshngaiñ ha Kashmir ha ka sngi Balang wat lada ka jingïakhih ka dang ïai bteng ban pyrshah halor ka jingshah pynïap jong u nongïalam ba hakhlieh duh jong ka Iran, u Ayatollah Ali Khamenei, ha ki jinghiar thma lang jong ka US bad ka Israel.
Ha kajuh ka por, ki pulit ki la buh da ka jingujor ejahar pyrshah ïa u MP jong ka National Conference Lok Sabha u Aga Ruhullah bad u Mayor barim ka Srinagar u Junaid Mattu halor ki jingthoh jong ki ha ki Social Media halor ka jingshah pynïap jong u Khamenei.
Ki pulit bad ki shipai ki la buh ïa ki wire bad ki la buh ïa ki kali shipai ha ki surok bapher bapher ha Srinagar bad kiwei kiwei ki jaka ba don jingma ban khanglad ïa ka jingleit jingwan jong ki paidbah.
La pyntreikam ruh ïa ki pulit ha ki jaka ba bun ki Shia ban pynduh ïa kino kino ki jingpyrshang ban ïakhih.
Katba ki kali shimet, ki kali ar shaka bad ki kali Auto-Rickshaw la shah ban ïaid, ki kali paidbah ki sahkut ha ki surok.
Ka Ghanta Ghar (Clock Tower) ba pawnam bha hapdeng jong ka nongbah Lal Chowk ka dang sah shabar pud na ka bynta ki riew paidbah, ha kaba ki bor pahara ki la set ïa katei ka jaka hadien ka jingïakhih kaba jur jong ki Shia Muslim ha ka Sngi U Blei pyrshah ïa ka jingshah pynïap jong u Khamenei. La pynher ruh ïa ka lama jong ka Iran hajrong jong ka Ghanta Ghar.
Halor kane ka jingeh, ki bor synshar ki la khang khyrdep lut ïa baroh ki jaka pule ha ka Valley haduh ka 7 tarik u Lber bad pynjlan ïa ki eksamin. Ki pulit kiba dang buddien bha ïa kane ka jingjia, ki la pynlong ruh ïa ka jingpynshitom beiñ ïa kaei kaba ki la batai kum ka “jingpyntip khubor lamler bad ki jingtip bakla.” Ki Social Media Account jong ki katto katne ki kotkhubor kiba don ha Kashmir, kiba kynthup ïa ka Greater Kashmir, Kashmir Life, Rising Kashmir bad Brighter Kashmir, ki la shah khang da ka Meta halor ka jingkyrpad jong ki bor jong ka aiñ.
“La ithuh ïa ki katto katne ki jingthoh ha ka Social Media, bad la khot ïa ki briew ban kylli jingkylli”, u la ong.
Ki pulit ki la kem ruh ïa u MP ka liang kaba bat ïa ka jingsynshar jong ka NC u Aga Ruhullah bad u Mayor barim ka Srinagar u Mattu halor ka jingkynnoh ba ki la pynsaphriang ïa ki jingthoh kiba ïalam bakla ha ka online hapoh ka Bharatiya Nyaya Sanhita.
“Ka jingdon jong ki jingkylli kumba la kdew hashwa, ka pynpaw ïa ka jingpynphriang ïa ki jingïathuhkhana ba la pynkylla khongpong bad ki jingtip bym lah ban pynshisha kiba lah ban wanrah ïa ka jingkulmar paidbah bad ka jingbym ïahap jingmut ha ka imlang sahlang. Kum kine ki jingpyrshang ba thmu ban pynphriang ïa ki jingtip kiba bakla ki buh jingma kaba khraw ïa ka jingsuk, ka jingshngaiñ, bad ka jingshong suk shongsaiñ baroh kawei,” ong u nongaiktien jong ki pulit.
“Ka jingtohkit ha baroh ar tylli ki jingjia ki dang ïaid shakhmat.”
Ki pulit ki la pynhiar kyrdan ruh ïa ka jingpahara ïa u MP ka NC u Ruhullah bad pynsangeh noh ïa ka facebook jong u katba u Mattu u la kam ba la weng noh ïa ka jingpahara jong u hadien ka jingkren paidbah jong u halor ka jingpynïap ïa u nongïalam bahakhlieh duh jong ka Iran u Khamenei bad namar ka jingkren pyrshah ïa ka jingsynshar ba la ïalam da ka BJP.
Ki pulit, ki la kem ruh ïa bun ngut ki nongïakhih, kiba ïashim bynta ha ki jingïakhih pyrshah ïa ka jingshah pynïap jong u Khamenei.
