Shillong, Lber 05
U Myntri Rangbah ka Jylla Conrad K Sangma u la sam ïa ki cheque ba shongdor haduh T.28.49 klur sha ki nongïoh jingmyntoi ha ki lai tylli ki C&RD Block ka East Garo Hills-Samanda, Songsak bad Dambo-Tongjeng-kaba dei na ka Green Meghalaya bad FOCUS +.
Ïa kane ka jingsam cheque la pynlong ha ka jingïalang rakhe ïa ka jingdap phra snem jong ka Sorkar Meghalaya Democratic Alliance (MDA).
U Myntri Rangbah u la ai nam sha ka jingkyrshan ki paidbah bad ka jingkyrshan ka Sorkar Pdeng namar ka jingpynïaid sted ïa ki jingtei bad ka jingkiew ka ïoh ka kot, haba pynpaw ba ka Meghalaya mynta ka wan ba-ar ha ka jingkiew ka ïoh ka kot hadien ka Tamil Nadu.
“Ngi la pynlut palat ïa ka T.150 klur hapoh ka FOCUS ha kine ki san snem bala leit,” u la ong ha ka jingïalang ba long ha Police Parade Ground.
“Ngin ïai bteng ban kyrshan ïa ki paidbah jong ka Jylla da kaba pynjlan ïa ka por pynrung kyrteng ba kin ïoh ïa ki jingmyntoi na ka FOCUS+ sa arsnem,” ong u Conrad.
U Myntri Rangbah u la ong ba da ka jingkyrshan ki paidbah ka Jylla, ka Sorkar Meghalaya kala ïoh ïa ka lad ban wanrah ïa bun ki skhim pynroi bad ki projek bad ka Jylla kala sakhi ïa ka jingkylla kaba khraw haba phai sha ka jingmih ki jingtei kiba kongsan. Haba pynpaw ïa ka jingsngewnguh ïa ka Sorkar Pdeng bad ïa u Myntri Rangbahduh, Narendra Modi ba kila ai ïa ka jingïarap ba donkam bad ka jingkyrshan ïa ka Jylla, u la pyntip ba ka Meghalaya ka wan ba-ar haba phai sha ka jingkiew ka ïoh ka kot hadien jong ka Tamil Nadu.
Ka Sorkar Meghalaya, katkum ka jingong u Myntri Rangbah, ka dang wad ïa baroh ki lad ki lynti ban wanrah ïa ki kam pynroi ha baroh ki bynta bad ka roi ka par kaba neh ha ka Jylla haba pan ïa ka jingïashimbynta jong ki shnong ki paidbah ban kynjoh ïa ka thong bala buh.
Katba na ka liang u Marcuise N Marak uba dei u Myntri ka Sorkar Jylla ba khmih ïa ka tnad PHE bad kiwei haba ai jingkren, u la ong ba hapoh ka “One Magnificent Meghalaya, Vision, 2032”, ka Meghalaya kala ïohi ïa ka jingkiew kaba khraw bha haba phai sha ki jingtei bad ka ïoh ka kot hapoh ka jingïalam jong u Myntri Rangbah Conrad K Sangma, uba don ïa ka jingïohi jngai ban pynlong ïa ka Meghalaya kawei na kiba biang eh ki Jylla ha India da kaba buh ïa ka thong ban kynjoh ïa ka 16 billion economy hapoh u snem 2032.
U pyntip ba shen ka Sorkar kan sa pynkha ruh ïa ka Horti-Agri College ha East Garo Hills ha ka dong Dawagre, Williamnagar bad ka Sorkar kala dep buh ïa ka mang tyngka halor kane ha ka Dorbar Mang tyngka ba dang shu dep.
