Jerusalem, Lber:
U myntri iada ri jong ka Israel, u Israel Katz, ha ka Sngi Balang, u la ong ba ha kaba sdang ka Israel ka la thmu ban hiar thma ia ka Iran ha ka shiteng jong u snem 2026, hynrei ki jingjia hapoh ka ri Islam bad ka jingkylla jong ka thain ki la wanrah ia ka por sha u bnai Rymphang.
“La thmu ban pynlong thma na ka bynta ka shiteng snem da kaba buh ia kajuh ka thong”, la ong u Katz ha ka jingkren sha ki heh jong ki tnad wad bniah jong ki shipai, katkum ka jingpynbna ba la pynmih da ka ophis jong u.
“Hynrei namar ki jingkylla ha ki jingjia bad ki jinglong jingman, khamtam eh kaei kaba la jia hapoh ka Iran, ka kyrdan jong u president jong ka US bad ka jinglah ban thaw ïa ka jingtreikam ba ïatylli, ka la long kaba donkam ban pynkynriah ïa kita ki jingthmu baroh sha u bnai Rymphang.”
Ha ka jingïakhih paidbah pyrshah sorkar ha Iran ha u Kyllalyngkot, kiba la shah pyndem ha ka jingpynshitom beiñ da ki bor pahara, u Trump u la kular ban kyrshan ïa ki nongïakhih, da kaba pynbna ba ka America ka ïeng ryngkat bad ki paidbah ka Iran.
Ki heh ophisar jong ka Israel, kynthup ïa u Myntri Rangbahduh ka ri, u Benjamin Netanyahu, ki la kren kum juh ki jingkren, ha kaba ki la kyntu ïa ki nong Iran, ba kin ïeng pyrshah ïa ki nongïalam lyngdoh jong katei ka ri.
Ka America bad ka Israel, ki la iasnohkti lang ha ka jinghiar thma ia ka Iran, ha ka sngi saitjain, bad ha ka jinghiar thma kaba nyngkong, ki la pyniap ia u nongialam ba ha khlieh duh jong ka Islamic republic, u Ayatollah Ali Khamenei.
