Khliehriat, Lber 05
Ki pulit jong ka East Jaiñtia Hills District ha ka 4 tarik Lber kila kem noh ïa u Waheh Shnong jong ka Lakadong Ummat u Ma Rimi Amkhloo halor ka jingjia ïakynad hapdeng ka shnong Lama bad Lakadong Ummat kaba la wanrah ka jinghuri hura bad shah siat haduh ban da mynsaw ki lai ngut ki nongshong shnong jong ka Lama.
Kane ka jingïakynad kala jia ha ka 3 tarik Lber, namar ka jingïa kam pud hapdeng ka shnong Lama bad ka shnong Lakadong Ummat ïa kawei ka bri kwai ba la tyrwa ban pynhap ïa ka surok Green Field High Speed Corridor.
Halor kane ka jingjia, ki nongïalam shnong jong ka Lama, ki la ujor da ka ejahar pyrshah ïa u Waheh Shnong bad pyrshah ïa ki katto katne ngut ki nongshong shnong jong ka Lakadong Ummat halor ka jingkynnoh ruh ba ki donkti ban siat da ki suloi bad pynmynsaw ïa ki briew.
Ki pulit kila pynlong ka jingtohkit pyrshah ïa u Waheh Shnong bad dang thwet ruh ban kem sa ïa kiwei kiwei kiba donkti halor kane ka jingjia.
Ki lai ngut kiba la mynsaw ki long u Biron Amrynsong, Argen Rupsi bad Cheerful Suchen.
Ïa u Cheerful Suchen uba la shah siat na ki bynta ka kpoh la pynkynriah noh sha Super Care Hospital, Shillong na ka daw ka jingjur ka jingmynsaw, katba u Biron Amrynsong ula shah siat na ki bynta jong ka khlieh bad Argen Rupsi u la shah siat na kti bad mynta ki dang don hapdeng ka jingshah sumar ha Woodland WK Hospital Sabahmuswang, West Jaiñtia Hills District.
Lah ban kdew ba u District Magistrate jong ka East Jaiñtia Hills u Manish Kumar, IAS naduh katei ka sngi, u la pynjari da ka kyndon 163 jong ka BNSS kaba khang pyrshah ha kine ki jaka kiba don ha ka jingïakajia hapdeng ki ar shnong.
U la khang pyrshah ïa ka jingïalum briew kaba palat ïa ka san ngut ha ki jaka ba don ha ka jingïakajia hapdeng ka shnong Lama bad Lakadong Ummat, bad la khang pyrshah ban rah ïa kino kino ki tiar pynmynsaw, kum ki tiar siat, ki tiar pynbthei, ki wait, ki dieng bad kiwei pat kiba lah ban pyndonkam kum ki tiar pynmynsaw.
La maham tyngeh ruh ïa kino kino ki briew ne kynhun kiba pynthut ne tuklar ïa ka leit ka wan jong ki briew, ki kali ne kiba pynpoi ïa ki mar ba donkam.
La mana tyngeh ruh ïa kino kino ki riew shimet ne kynhun ban pynthut ïa ka shongsuk shongshngaiñ, ki kam pynshit ne ai ding ban pynmih jingïakynad bad kino kino kiba ïaleh pyrshah kin shah pynngat ha ki kyndon aiñ bapher bapher jong ka BNS lem bad kiwei pat ki kyndon aiñ.
