Mairang, Lber 05
Ka District Magistrate jong ka Eastern West Khasi Hills District lyngba ka kyndon aiñ 163 BNSS, 2023 ka la pynmih ïa ka hukum ban khang ïa ka jingïaid ki kali heh kiba kit ïa ka jingkhia kaba palat ïa ka 9 ton na ka surok Mawmaram – Nongthliew – Mawmih – Mawlyndep kaba hap hapoh u pud u sam ka Eastern West Khasi Hills District.
Shuh shuh ha ka kyrwoh khubor, ka District Magistrate kala pynpaw ruh ba kala pynmih ïa kane ka hukum, hadien ka jingïoh jingtip ba ki la don bun tylli ki kali heh kiba kit palat ïa ka 9 ton ka jingkhia kiba ïaid man ka sngi na ka surok Mawmaram – Nongthliew – Mawmih – Mawlyndep kaba la buh jingeh ïa ka ïaid ka ïeng jong ki nongshong shnong khamtam ki khynnah skul bad ruh kaba la wanrah ïa ka jingjot jong katei ka surok na ka jingïaid ki kali heh kiba kit palat ïa ka jingkhia.
Ka District Magistrate kala ong ruh ba lada lap ïa kino kino kiba ïaleh pyrshah bad pynkheiñ ïa kane ka kyndon aiñ kin ngat ha ka jingshah pynshitom katkum ka Section 223 jong ka BNSS, 2023.
Nangta, ka kyrwoh khubor ka ong ruh ba kane ka hukum kan treikam naduh mynta tad haduh ban da pynbna da kumwei pat, ha kajuh ka por lada don ki bym sngew ïahap ïa kane ka kyndon, ki lah ban leit mih sha ka ophis ka Deputy Commissioner, Eastern West Khasi Hills District na ka bynta kiwei pat ki jingpynkylla lada idonkam.
