Shillong, Lber 05
Ka bor District jong ka East Khasi Hills ka la pynmih ïa ka hukum ba la khang ïa ki nongshong shnong ban pynïeng khyrdop ha ki surok jong ka tnad Public Works ha Pepbah, da kaba maham ba katei ka khyrdop ka khang beaiñ ïa ka leit ka wan jong ki paidbah bad ka lah ban nang ai ding ïa ka jingïakajia jaka.
Ka District Magistrate ka Kong Rosetta Mary Kurbah ka la pynmih ïa ka hukum katkum ka kyndon 163 jong ka BNSS hadien ba la mih khubor ba ka shnong Mawlyngad-Pepbah ka la pynïeng khyrdop ha surok PWD hapdeng ka jingïakajia pud bad ka shnong Thadan halor ka jaka rep ha Lyntung.
Ka hukum ka kdew ba ka surok PWD ka dei ka surok paidbah bad ba ym don u riew shimet, ka bor synshar shnong, ne ka Dorbar Shnong kaba don ïa ka bor katkum ka aiñ ban khanglad, ne pynbeit ïa ka jingleit jingwan jong ki paidbah.
Ka hukum ka shim ba ka jingpynïeng khyrdop ka khanglad ïa ka leit ka wan jong ki paidbah kaba la buh jingma ïa ka shongsuk shongsain.
“Nga khang pyrshah ban pynïeng khyrdop ha ka shnong Mawlyngad Pepbah harud ka surok PWD ha ka surok Pepbah bad ailad ïa ka jingïaid laitluid jong ki paidbah jong baroh ar tylli ki shnong,” la ong ka hukum.
