Shillong, Lber 05
Ka Seng Samla Mawlong Mawriang bad ka Friends United ki la khur ïa ka jingjop ha ka lympung ïalehkai 5th District League T20 Cricket Tournament 2026 ba la pynïaid da ka East Khasi Hills Cricket Association ha ka sngi Palei.
Ha kane ka jingïakhun kaba la long ha madan Saitsohpen kaba ha Sohra, ka Seng Samla Maw-long Mawriang ka la pynliem noh ïa ka Sohra Police Combine da 78 run. Ka Seng Samla Mawlong Mawriang kaba la kam trai ban tied nyngkong, ka la kamai 194 run bad shah pynhap 7 wiket ha ki 20 over. Kane ka la wan lyngba ka jingïalehkai bha u Rahul Shimsubro u ba la ïoh ban khyrwit ïa ka spah run kaba 104 na ki 48 bol. Katba u Adrian Nongbri u la khur 3 wiket na ka bynta 26 run ha ki 3 over.
Haba wan beh ïa ka thong ki nongtied ka Sohra Police Combine ki la shah pynkhyllem baroh bad kamai tang 116 run ha ki 16.5 over. U A.E Marbaniang u la tied 41 run na ki 26 bol. Katba u Bankit Nongtraw u la khur 5 wiket na ka bynta 30 run ha ki 3 over. Ïa ka nam Player of the Match la khur da u Rahul Shimsubro.
Haba phai sha kawei pat ka jingïakhun kaba ar, ka Friends United ka la jop da 52 run ïa ka Marbisu CC. Ka Friends United kaba la shimti ban tied nyngkong ka la kamai 188 run bad shah pynhap 7 wiket ha ki 20 over. U Ernestin Kyntiewbor Swer u la long u nongtied uba kynsai ha kaba u la lah ban kamai 89 run na ki 36 bol. Katba u Ramesh Rai u la khur 3 wiket na ka bynta 30 run ha ki 4 over.
Haba wan shimti ïa ka pali kaba ar, ka Marbisu ka la kamai tang 136 run hadien ba ka la shah pynkhyllem baroh ki nongtied ha ki 19.4 over. U Rohan Rai u la tied 39 run na ki 24 bol. Katba u Precious Nongrud u la khur 3 wiket na ka bynta 12 run ha ki 4 over. Ïa ka nam Player of the Match la khur da u Ernestin Kyntiewbor Swer.
