Shillong, Lber 05
Ki khynnah ïalehkai kickboxing ka Jylla hapoh ka lama jong ka All Meghalaya Kickboxing Association (AMKA) ki la wanrah nam bad burom ïa ka ri India hi baroh kawei da kaba khur takma ha ka Asian Pacific International Kickboxing Championships 2026 kaba la long naduh 24 haduh 28 tarik u Rym -phang ha Bali, Indonesia.
Ïa ka takma ksiar da ka Ame-grace Nongbsap (10 snem) ha ka Sub Junior Semi Contact 22kg bad ka Ozanica Nongbsap (12) ha ka Sub Junior Semi Contact 30kg. Ïa ki takma rupa la khur da ka Banshailin Grace Masharing (14 snem) ha ka Sub Junior Semi Contact 45kg. Ïa ki takma rnong la khur da ka Blaiona Khamujai (19 snem) ha ka Senior Full Contact 47kg bad u Mewan-pyndap Marpan (16 snem) ha ka Junior Full Contact 58kg.
Halor kane ka jingjop, na ka liang u President ka AMKA u Bah Samuel Hashah u la pynpaw ïa ka jingsngewkmen ïa ki khynnah kiba la wanrah nam bad burom ïa ka Jylla ha katei ka lympung kaba la long ha Indonesia.
Shuh shuh katei ka synjuk ka la pynkup burom ruh ïa kitei ki khynnah ha ka sngi Palei ha Shillong Press Club na ka bynta ban pynshlur ïa ki ba kin nangïai trei shitom shuh shuh na ka bynta ki lympung ki ban dangwan nangne shakhmat.
