Shillong, Lber 05
Ka All Achik Youth Federation (AAYF) ka la kyntu ïa ki Pulit ka West Garo Hills ban register da ka Suo motu case pyrshah ïa u MDC barim ka Baitbari u Sofior Rahman, da kaba kynnoh ba ka jingkren jong u Sofior lyngba ka video ha facebook, ka ibeiñ ïa ka hok long riewlum ki Garo bad kynthoh pyrshah ïa ka dustur ai jait kmie.
Ha ka kyrwoh, u Vice President ka AAYF u Rikkam P Marak u la kynnoh ba u Sofior Rahman u la ïai bteng ban tuklar bad pynkheiñ ïa ki hok jong ki riewlum bad ka Federation ka dawa ba dei ban set phatok ïa u hapoh ki kyndon Bharatiya Nyaya Sanhita, 2023, bad ka SC/ST (Prevention of Atrocities,19 Act) A9.
“Ngi kyntu ïa ki bor ka aiñ West Garo Hills ban register da ka Suo Motu pyrshah ïa u hapoh ki kyndon aiñ,” u la ong.
Ha ka shithi, ka Federation ka kdew 8 tylli ki kyndon, ba kynthup ïa ki kyndon 46, 122(2), 192, 196(1)(a), 352 bad 353 jong ka BNS, bad ki kyndon jong ka kyndon 3(1) jong ka ain SC/ST, bad ka la kynnoh ba ka jingkren une u MDC barim ka buh jingma ïa ka shongsuk shongsain bad ïa ka burom trai ri trai muluk.
Ka AAYF ka la pynmih ruh ïa ka jingïakren halor ka jingsumar khun, da kaba kynnoh ba ka jingshim jong u Rahman ïa ka khun kynthei ka long pyrshah ïa ka aiñ riti dustur jong ki Garo, ha kaba ka kmie ka bat ïa ka jingsumar khun.
Ka jingkren ka thew ïa ka histori jong ka longïing jong u Sofior Rahman, ki kmie ki kpa tymmen jong u, ki wan na Dhubri, Assam, sha Baitbari ha u snem 1965, hadien ka jingshlei um bad ka ïathuh pat ïa kawei ka jingjia ha u snem 2009 ha kaba la kynnoh ba ki nong Garo kiba na katei ka jaka ki la pynjulor ïa ka kali jong u.
“Ki kmie ki kpa jong u Sofior Rahman ki la wan buhai shnong sha Baitbari, West Garo Hills, Meghalaya na ka Elaka Dhubri jong ka Assam, ryngkat bad ki 100 tylli kiwei pat ki longïing, ha u bnai Risaw, 1965 namar ka jingshlei um ha ka Elaka Dhubri jong ka Assam, bad ki don ki nongïalam bamsap kiba pynïoh ïa ki kot ki sla tang ban pyndonkam ïa ki kum ka Vote Bank”.
